Dalgħodu tħabbret il-mewt tan-Nutar Joseph Spiteri fl-eta’ ta’ 95 sena. In-Nutar Spiteri kien Ministru u Membru Parlamentari f’isem il-Partit Nazzjonalista għal diversi snin.
In-Nutar Spiteri kien membru fil-kabinett tal-Prim Ministru Gorg Borg Olivier meta pajjiżna kiseb l-indipendenza. Tul is-snin serva bħala Ministru tal-Agrikultura, tal-Industrija u l-Kummerċ u tax-Xogħolijiet u l-Housing sabiex b’hekk il-karriera Ministerjali tan-Nutar Spiteri estendiet mill-1962 sa’ l-1971.
Huwa serva bħala membru parlamentari bejn l-1955 u 1971.
L-isem tan-Nutar Joseph Spiteri huwa marbut sew mal-lokalita’ tan-Naxxar. Huwa marbut ukoll mal-lokalita’ ta’ Ħal Balzan tant li s-Sindku attwali ta’ Ħal Balzan in-Nutar Ian Spiteri jiġi n-neputi tal-eks Ministru in-Nutar Joseph Spiteri.
Intant fi stqarrija l-Partit Nazzjonalista sellem il-memorja tal-eks Ministru Nazzjonalista Ġużi Spiteri. Il-Partit Nazzjonalista fl-istqarrija wassal il-kondoljanzi tiegħu lill-familja Spiteri f’dan il-mument diffiċli.
Stqarrija oħra ta’sogħba llum saret mill-Kulleġġ ta’ l-Ex-Parlamentari u Ex-Uffiċjali tal-Partit Nazzjonalista li selmu l-memorja tan-Nutar Spiteri u ddeskrivewh bħala politiku rispettat u ammirat għall-integrita’ u onesta’ tiegħu fil-ħajja pubblika.
