Għal darb’oħra Heritage Malta se terġa’ tieħu sehem fl-attivitajiet tan-Notte Bianca. Għal din l-okkażjoni nhar is-Sibt li ġej id-dħul fil-mużewijiet ta’ Heritage Malta fil-Belt se jkun b’xejn.
Dawn il-mużewijiet huma l-Mużew Nazzjonali tal-Arkeoloġija, l-Armerija u l-Kmamar Statali fil-Palazz tal-Granmastru u Forti Sant’Iermu li tospita l-Mużew Nazzjonali tal-Gwerra.
Għal din l-okkażjoni Heritage Malta se tesebixxi wkoll artefatti Eġizzjani mill-kollezzjoni nazzjonali f’wirja li se tittella’ fil-Berġa ta’ Kastilja.
Matul in-Notte Bianca l-mużewijiet imsemmija se jiftħu bejn is-18.00 u nofs il-lejl, bl-aħħar dħul ikun fil-23.30, u d-dħul ikun b’xejn.
Iktar tagħrif dwar Heritage Malta u l-attivitajiet organizzati minn din l-aġenzija nazzjonali jista’ jinkiseb mill-website, www.heritagemalta.org, jew mill-paġna uffiċjali ta’ facebook.
Il-Bank Ċentrali ta’ Malta jiftaħ fin-Notte Bianca
Għal darb’oħra, il-Bank Ċentrali ta’ Malta ser jipparteċipa fl-edizzjoni ta’ din is-sena tan-Notte Bianca li ser issir is-Sibt, 7 ta’ Ottubru 2017. Il-bini prinċipali tal-Bank fi Pjazza Kastilja ser ikun miftuħ għall-pubbliku bejn is-sitta u l-ħdax ta’ filgħaxija.
Dawk li jżuru l-Bank ser ikollhom l-opportunità li jżuru l-mużew tal-flus, fejn hemm għażla impressjonanti ta’ muniti u karti tal-flus fiċ-cirkolazzjoni li ntużaw f’Malta matul iż-żminijiet, kif ukoll wirja speċjali ta’ muniti użati fil-ġojjellerija u għal skopijiet oħrajn. Barra minn hekk, il-passaġġ ta’ bejn id-dħul għall-Bank faċċata tal-Funtana tat-Tritoni u l-passaġġ li jwassal għal Triq Ġlormu Cassar ser ikun miftuħ għall-pubbliku. F’dan il-passaġġ ser ikun hemm għall-wiri ritratti bit-tema tal-Belt Valletta. Il-viżitaturi jistgħu jżuru wkoll il-Victor Pasmore Gallery u wirja tal-bonsaj imtellgħa f’kollaborazzjoni mal-Bonsai Culture Group fil-ġonna tal-Bank li ġew inawgurati riċentement.
Matul din l-attività, il-viżitaturi jistgħu jżuru l-Malta Coin Centre fejn ikunu jistgħu jixtru varjetà ta’ muniti numiżmatiċi u tal-kollezzjoni. Ser ikun hemm ukoll materjal ta’ informazzjoni disponibbli għall-pubbliku dwar it-tisrif ta’ karti tal-flus Maltin f’euro li jista’ jsir fil-Bank Ċentrali ta’ Malta sal-31 ta’ Jannar 2018.
Aktar informazzjoni tista’ tinkiseb minn fuq is-sit elettroniku tal-Bank www.centralbankmalta.org, jew billi wieħed iċempel lill-Malta Coin Centre fuq (+356) 2550 6006/7.
