Is-Sindku ta’ San Pawl il-Baħar Graziella Galea rriżenjat mill-pożizzjoni tagħha li kien ilha tokkupa sa mill-elezzjoni tal-2015, fejn ġiet eletta b’mod demokratiku.
F’ittra lill-Aġent Deputat Segretarju Eżekuttiv, Graziella Galea qalet li qed tagħmel dan għaliex temmen li l-pożizzjoni ta’ Sindku u kunsillier qiegħdin hemm biex wieħed iservi lir-residenti u lill-lokalità u mhux biex wieħed jisserva hu, jew li jtellef il-progress.
“Fix-xogħol tiegħi bħala Sindku dejjem poġġejt bħala l-ewwel prijorità tiegħi lir-residenti u dejjem ġenwinament ħdimt biex il-lokalità timxi ‘l quddiem,” iddikjarat Galea fl-ittra tar-riżenja.
Hi nnutat li matul din il-leġiżlatura kien hemm numru ta’ kunsilliera li ma tawx każ tar-residenti, fosthom billi naqsu milli jattendu l-laqgħat jew fixklu mill-ħidma.
Kompliet li ħadet dan il-pass “sabiex ir-residenti ma jibqgħux ostaġġi tal-mibgħeda u l-kilba għall-poter ta’ xi wħud li ma aċċettawx ir-riżultat tal-elezzjoni tal-Kunsill Lokali.”
Fi stqarrija, il-Partit Nazzjonalista qal li Galea qiegħda tagħmel dan b’lealtà lejn ir-residenti tal-lokalità u lejn il-Partit Nazzjonalista sabiex il-Partit Nazzjonalista jibqa’ jgawdi t-tmexxija ta’ dan il-Kunsill.
Graziella Galea se tibqa’ sservi lir-residenti ta’ San Pawl il-Baħar bħala kunsilliera f’isem il-Partit Nazzjonalista.
Graziella Galea tirriżenja minn Sindku ta’ San Pawl il-Baħar.
Iktar fuq: https://t.co/yZQOe6xp7o pic.twitter.com/wE8HzvEkcX
— Partit Nazzjonalista (@PNmalta) January 10, 2018
