Wisq probabli, l-elezzjonijiet f’Malta għall-Membri tal-Parlament Ewropew u dik tal-Kunsilli Lokali se jsiru s-Sibt 25 ta’ Mejju 2019. Dan hekk kif ftit tal-ħin ilu, l-mexxejja tal-gruppi politiċi fil-Parlament Ewropew qablu biex l-elezzjonijiet għall-Parlament Ewropew isiru fi tmiem il-ġimgħa ta’ bejn il-Ħamis 23 u l-Ħadd 26 ta’ Mejju 2019.
Kif jiġri dejjem, l-elezzjonijiet f’Malta jsiru s-Sibt u għalhekk, kollox jindika li l-poplu Malti u Għawdxi jkun mistieden joħroġ jivvota biex jagħżel il-Membri tal-Parlament Ewropew u l-Kunsilliera Lokali s-Sibt 25 ta’ Mejju 2019. Dakinhar isiru ż-żewġ elezzjonijiet fil-lokalitajiet kollha ta’ Malta u Għawdex.
Issa li l-Parlament Ewropew approva dawn id-dati, jkun imiss il-Kunsill Ewropew li japprovahom.
