Ftit wara s-1.30pm, iddaħlu f’Xatt it-Tiben 100 immigrant irregolari ieħor.
Huma ddaħlu abbord il-patrol boat P52 u magħhom kien hemm ukoll żewġ immigranti oħra li mietu matul il-vjaġġ fil-Mediterran.
Fi stqarrija, qabel ma waslu f’pajjiżna, il-Gvern spjega li l-immigranti ġew salvati mill-patrol boat tal-Armata 68 mil nawtiku ‘l barra mill-kosta Maltija.
Dan kien it-tielet każ ta’ immigranti li waslu Malta fi ftit jiem, hekk kif fi tmiem il-ġimgħa ddaħħal grupp ta’ 61 persuna u f’Santa Marija daħlu 35 immigrant.
Għaldaqstant, f’ġimgħa daħlu Malta madwar 200 immigrant irregolari.
Sadanittant, il-Gvern ikkonferma wkoll li Malta għadha qed iżżomm parti mill-immigranti li daħlu fis-27 ta’ Ġunju abbord il-bastiment MV Lifeline.
Fi tweet il-Kap tal-Partit Nazzjonalista Adrian Delia faħħar il-ħidma tal-Forzi Armati Maltin li qed isalvaw dawn il-ħajjiet. Qal li Malta qed tagħmel aktar milli jmissha. Ħeġġeġ lill-gvern sabiex ikompli jagħmel pressjoni fuq l-Unjoni Ewropea biex ir-responsabiltà tinġarr minn kulħadd għaliex pajjiżna ma jistax jitħalla waħdu.
Courage bravery & dedication is part of every day life for our men and women in uniform @Armed_Forces_MT
Malta 🇲🇹 is doing much more than its fair share. @MaltaGov needs to press harder for Europe to share responsibility as we cannot be left alone.https://t.co/YkWbW8o7C8— Adrian Delia (@adriandeliapn) August 22, 2018
Filmat: Joe Francalanza
Muntaġġ: Beverly Abela
Ritratti: Martin Agius
