Simon Yates rebaħ La Vuelta għall-ewwel darba wara li temm b’suċċess l-aħħar stadju f’Madrid. Teżisti tradizzjoni li fl-aħħar stadju min ikun jinsab fuq quddiem ma jkunx attakkat u għalhekk kien hemm bżonn biss li Yates jaqsam il-linja finali.
Dan is-suċċess fisser li tliet ċiklisti Britanniċi rebħu t-tliet Tours il-kbar fiċ-ċikliżmu. Chris Froome rebaħ il-Giro d’Italia u Geraint Thomas rebaħ it-Tour de France.
It-Taljan Elia Viviani rebaħ l-aħħar stadju li kien twil 100 kilometru fi sprint. Fi tmiem li fih ra diversi ċiklisti f’distakk żgħir, Viviani għeleb liċ-champion tad-dinja Peter Sagan u Giacomo Nizzolo biex kiseb it-tielet rebħa ta’ stadju f’din l-edizzjoni.
B’hekk iċ-ċiklisti Britanniċi rebħu disa’ mill-aħħar 20 Grand Tours, mixja li bdiet meta Sir Bradley Wiggins kien sar l-ewwel Britanniku li jirbaħ Grand Tour, bir-rebħ tat-Tour de France fl-2012. Kien biss darbtejn oħra fil-passat, li ċiklisti mill-istess pajjiż rebħu t-tliet tiġrijiet fl-istess staġun, iżda din hi l-ewwel darba li saret minn ċiklisti differenti.
Yates kien mar fuq quddiem fid-disa’ stadju wara li kien 14-il sekonda wara Alejandro Valverde, li kien rebaħ it-tmien stadju. Iżda Yates kien spiċċa sekonda qabel Valverde wara li Ben King kien inqata’ minn mal-grupp.
Hu tilef il-quċċata fit-12-il stadju, iżda wara li rebaħ l-14-il stadju fit-telgħa ta’ La Camperona reġa’ libes il-flokk l-aħmar. Minkejja li d-distakk kien ta’ ftit sekondi, Yates fetaħ vantaġġ ta’ 20 sekonda fuq Valverde u 25 sekonda fuq Nairo Quintana.
It-time trial tas-16-il stadju setgħet tellfet lil Yates, iżda l-Britanniku kien l-aktar veloċi mill-isfidanti kollha u rebaħ seba’ sekondi oħra fuq Valverde. Dan il-vantaġġ fuq ir-rebbieħ tal-2009 deher li seta’ jkun mhedded iżda hu kważi assigura r-rebħa fid-19-il stadju meta attakka l-aħħar telgħa u għeleb lil Valvede b’aktar minn minuta.
Kif spiċċaw il-21 stadju
1. Elia Viviani
2. Peter Sagan
3. Giacomo Nizzolo
4. Danny Van Poppel
5. Marc Sarreau
6 Jon Aberasturi Izaga
7. Simone Consonni
8. Matteo Trentin
9. Tom Van Asbroeck
10. Ryan Gibbons
Klassifika Finali
1. Simon Yates 82:05.58
2. Enric Mas Nicolau +1.46
3. Miguel Angel Lopez +2.04
4. Steven Kruijswijk +2.54
5. Alejandro Valverde +4.28
6. Thibaut Pinot +5.57
7. Rigoberto Uran +6.07
8. Nairo Quintana +6.51
9. Ion Izaguirre +11.09
10. Wilco Kelderman +11.11
