Il-Ministru Tork għall-Affarijiet Barranin, Mevlut Cavusoglu, qal, waqt intervista, li l-Prinċep Sawdi Mohammed bin Salman talab laqgħa mal-President tat-Turkija Recep Tayyip Erdogan u li ‘ma teżistix raġuni għalfejn il-laqgħa mgħandhiex issir’.
Cavusoglu spjega li t-talba, permezz ta’ telefonata, kienet dwar ‘il-possibbiltà li Mohammed bin Salman u Erdogan jiltaqgħu fi Buenos Aires’ u li l-President Tork kien qed jikkunsidra l-affarijiet. Dan meta Erdogan u l-Prinċep it-tnejn se jattendu l-laqgħa tal-G20 (għall-aktar pajjiżi industrijalizzati tad-dinja) li ssir fl-Arġentina aktar ‘il quddiem din il-ġimgħa.
Ir-relazzjonijiet bejn l-Arabja Sawdija u t-Turkija huma karatterizzati bit-tensjoni wara l-qtil, ix-xahar li għadda, tal-ġurnalista Sawdi, Jamal Khashoggi, ġewwa l-konsulat Sawdi f’Istanbul. Wara li s-Sawdi, għall-bidu, ħarġu b’diversi versjonijiet kontradittorji, huma, imbagħad, żvelaw li l-ġurnalista (li kien kritiku tat-Tmexxija f’Riyadh) spiċċa maqtul u mbiċċer ‘wara li fallew in-negozjati biex jipperswaduh jirritorna fl-Arabja Sawdija.’
L-ogħla uffiċjali fl-Arabja Sawdija qalu kemm-il darba li l-Prinċep Salman ma kellu l-ebda għarfien jew konnessjoni mal-qtil, li t-Turkija qed tgħid li twettaq minn skwadra ta’ 15-il agent Sawdi li inkludiet ukoll membru tal-grupp tas-sigurtà madwar il-Prinċep.
Min-naħa tiegħu, il-President Erdogan qal li l-qtil ta’ Khashoggi kien ordnat mill-ogħla livell tat-tmexxija tal-Arabja Sawdija. Intant, il-fatt li l-Mexxej Tork warrab għall-possibbiltà li d-direttiva ngħatat mir-Re (Sawdi) Salman qed jitfa’ ‘l-attenzjoni’ fuq il-Prinċep ta’ 33 sena, li hu iben ir-Re.
//= $special ?>