Il-Pulizija qed tinvestiga allegazzjonijiet li saru minn sid ta’ żiemel b’rabta mat-tellieqa li suppost issir nhar il-Ħadd li ġej, meqjusa bħala l-Gran Final ta’ dan l-istaġun.
Din it-tellieqa, li issa ġiet posposta, kienet qed issir biex tikkommemora anniversarju importanti għall-Malta Racing Club tant li kienet sponsorjata mill-istess klabb.
Jirriżulta li wieħed mis-sidien taż-żwiemel ma qabilx mal-polza u kien hawn li nqala’ argument li matulu kien hemm ġlied fost akkużi lill-Kumitat bi frodi u korruzzjoni. Dan għaliex akkuża lill-Kumitat li bagħbas il-polza.
Kien hawn li ssejħet l-assistenza tal-Pulizija, bil-kumitat li offra ruħu għad-dispożizzjoni tal-uffiċjali tal-Pulizija biex isiru l-investigazzjonijiet meħtieġa filwaqt li nfetħet anke inkjesta maġisterjali.
Net News hu nfurmat li minn dakinhar ġew issiġillati wkoll l-uffiċċji fil-korsa tal-Marsa biex l-investigaturi jkunu jistgħu janalizzaw is-sistemà li biha jittellgħu l-poloz.
F’risposta lil dan l-istazzjon, il-Malta Racing Cub iddikjara li sabiex tiġi salvagwardjata l-integrità ta’ dan l-isport il-Kunsill se jqabbad awditur indipendenti biex jinvestiga s-sistemà għas-serħan tal-moħħ ta’ kulħadd. L-istqarrija tgħid ukoll li t-tellieqa se tibqa’ posposta sakemm titlesta l-investigazzjoni u joħroġ ir-riżultat tagħha.
Dan l-istazzjon ipprova jagħmel kuntatt ukoll mal-Pulizija, li madankollu ma tawniex informazzjoni iżda talbuna nibagħtu l-mistoqsijiet permezz ta’ email. S’issa għadna bla risposta.
//= $special ?>