Jan Jambon, il-Ministru tal-Intern Belġjan, qal li l-mewġa ta’ rejds li kien hemm nhar il-Ħadd fl-inħawi tal-belt kapitali Brussell saret wara indikazzjoni li kien imminenti attakk kbir.
Jambon kien qed jirreaġixxi għal rapporti fil-midja Belġjana li qalu li militanti Iżlamiċi kienu qed jippjanaw attakk fil-belt kapitali Belġjana, simili għal dak li sar f’Pariġi fit-13 ta’ Novembru.
Jambon qal li wieħed ma jaqbadx u jimponi livell ta’ allert ta’ dak il-livell jekk ma jkunx hemm theddida serja u imminenti.
Nhar il-Ħadd, il-Pulizija Belġjana arrestat 16-il persuna imma kollha nħelsu ħlief wieħed, filwaqt li ma nstabux splussivi jew armi.
Fl-istess ħin, il-Gvern ordna lis-servizzi tal-emerġenza biex jassiguraw li fosthom m’hemmx estremisti vjolenti b’attenzjoni partikulari għas-servizz tal-ambulanza. Maggie De Block, il-Ministru tas-Saħħa Belġjana, qalet li jrid ikun assigurat li kulħadd ikollu karta ta’ identità tal-post tax-xogħol.
Sadattant, fi Brussell, l-iskejjel reġgħu fetħu u s-servizzi tat-trasport qed jerġgħu lura għan-normal fost miżuri kbar ta’ sigurtà.
