L-għaqda dinija tas-saħħa ddikjarat il-virus Zika bħala emerġenza globali u tajjeb li tkun taf jekk dan il-virus huwiex ta’ theddida għalik.
Hu mifhum li l-virus qed iwassal biex eluf ta’ trabi qed jitwieldu b’imħuħ mhux żviluppati. Madanakollu, sakemm m’intiex tqila jew qed tippjana li tkun tqila, iz-Zika mhuwiex kunsidrat bħala ta’ theddida kbira. Filfatt, iz-Zika joħroġ biss f’persuna waħda minn kull ħamsa li jkunu infettati.
X’inhuma s-sintomi?
Jekk joħroġlok il-virus, aktarx tinduna li jkollok id-deni, raxx, uġiegħ fil-ġogi, uġiegħ ta’ ras u għajnejn ħomor. Is-sintomi jibqgħu miegħek għal madwar ġimgħa.
Kif jinfirex il-virus Zika?
Iz-Zika jinfirex min-nemus infettat u fl-Amerika kien rappurtat l-ewwel każ taz-Zika trażmess sesswalment.
Kemm ilu jeżisti dan il-virus?
Il-virus tfaċċa l-ewwel darba fl-1947 fix-xadini. Minn dak iż-żmien ‘l hawn, il-virus rari infetta n-nies u għal din ir-raġuni, ftit hemm informazzjoni dwar il-virus.
S’issa, hemm aktar 20 pajjiż fl-Amerika Latina infettati bil-virus u f’Malta tfaċċa l-ewwel każ tal-virus Zika, f’żagħżugħ li kien vaganza fil-Gżejjer Paċifiċi.
Kif tevita li timrad biz-Zika?
Peress li għad m’hemm l-ebda vaċċin li jikkura z-Zika, hu rakkomandat li wieħed jiflittja d-dar fejn jgħix, juża creams għal kontra l-gdim tan-nemus u jilbes kemm jista’ jkun ħwejjeġ biex ikunu evitati l-gdim tan-nemus.
Hemm vaċċin li jikkura z-Zika?
S’issa għad m’hemmx vaċċin li jikkura z-Zika. Pero’ wieħed tista’ jipprova jikkura s-sintomi billi jistrieħ, jixrob ħafna ilma u jieħu l-paracetamol biex ittaffi d-deni u l-uġiegħ.
Għandek għalfejn tinkwieta?
Wieħed għandu jevita li jsiefer lejn l-Amerika Latina, iżda sakemm jibqa’ Malta wieħed m’għandux għalfejn ikun allarmat. L-unika każ ta’ Zika f’Malta huwa iżolat u allura hu diffiċli li l-persuna konċernat jingidem minn xi nemusa li tista’ imbgħad tinfetta lil xi ħaddi ieħor.
//= $special ?>