Tkompli l-mewġa ta’ arresti fit-Turkija wara l-attentat ta’ kolp ta’ stat li kien hemm.
Dan hekk kif issa kien imiss lill-ġurnalisti u lill-impjegati tat-Turkish Airlines.
Il-Pulizija Torka t-Tnejn ħarġet mandati ta’ arrest fil-konfront ta’ 40 ġurnalist Tork.
It-Tnejn tħabbar li l-linja nazzjonali Torka, it-Turkish Airlines, kienet keċċiet aktar minn 100 impjegat, li jikludu kemm membri tal-management kif ukoll tal-cabin crew. It-tkeċċijiet mit-Turkish Airlines saru wara li kien determinat li dawn kellhom rabtiet mal-moviment reliġjuż li l-President Tayyip Erdogan qed isostni li kien wara l-attentat ta’ kolp ta’ stat tal-15 ta’ Lulju u li matulu 240 persuna tilfu ħajjithom.
Sadattant, Jean Claude Juncker, il-President tal-Kummissjoni Ewropea, qal li t-Turkija ma kienet f’ebda pożizzjoni li ssir membru tal-UE fil-ġejjieni qrib. Hu żied li jekk it-Turkija tintroduċi l-piena tal-mewt, allura l-pajjiż jista’ jinsa għal kollox in-negozjati għas-sħubija.
Hu qal li, fil-pożizzjoni preżenti, il-possibbiltà li t-Turkija tissieħeb fl-UE tbegħdet aktar minn qatt qabel.
