L-awtoritajiet fil-Ġermanja jistgħu mill-ġdid jintroduċu forma ta’ lieva għall-persuni ċivili bl-iskop li jgħinu lill-Armata tieħu ħsieb ‘diżastru tal-futur’. Fil-fatt, ir-rwol tal-persuni ċivili hu parti minn strateġija ġdida għad-difiża ċivili li l-Gvern, għada, se jiddiskuti f’Berlin.
F’każ ta’ kriżi potenzjali, iċ-ċivili jistgħu jkunu obbligati li jgħinu fit-tmexxija tat-traffiku jew jipprovdu l-fuel u l-akkomodazzjoni lill-militar.
Sadanittant, il-maġġoranza tal-Ġermaniżi ma jidhrux wisq ippreokkupati dwar l-istrateġija għal-lieva, li xi deputati fissruha bħala ‘spekulazzjoni intiża biex tbeżża’ lin-nies’.
Madankollu, il-kelma Wehrpflicht (lieva) kienet qed tispikka fuq id-diversi mezzi tal-medja soċjali fil-Ġermanja.
Il-Gvern Ġermaniż qal li filwaqt li ‘mhux probabbli’ li jseħħ diżastru fuq skala nazzjonali, jeħtieġu xorta t-tħejjijiet f’każ ta’ xi attakk terroristiku jew konflitt li jinvolvi mezzi ċibernetiċi li jħallu impatt negattiv għall-infrastruttura importanti.
