Mietu talanqas sbatax il-persuna fost nirien li ħakmu bini li kienet isservi bħala residenza għall-anzjani. L-awtoritajiet, intant, qegħdin jinvestigaw l-inċident fatali fir-residenza li tinsab fil-villaġġ ta’ Bile, ftit ‘il barra minn Kiev, il-belt kapitali tal-Ukrajna.
Ir-rapporti qalu li n-nirien qabdu fis-sigħat bikrin tal-Ħadd u qerdu kwartier sħiħ tal-kumpless magħmul minn żewġ sulari, fejn kien hemm alloġġjati xi 35 anzjan.
Is-servizzi li wieġbu minnufih għall-emerġenza rnexxielhom isalvaw xi 18 il-persuna, li wħud minnhom intbagħtu l-isptar fejn instabu li kienu qed ibatu minn diversi tipi ta’ ħruq.
Id-dar inkwistjoni kienet magħmulha mill-injam u kienet ilha mibnija mill-1950. Intant, twaqqfet kummissjoni speċjali biex tiddetermina l-kawża speċifika tat-traġedja.
Il-Prim Minsitru tal-Ukrajna, Vladimir Groisman, fisser l-inċidenza tan-nirien bħala ‘traġedja terribbli li ssarrfet f’nuqqas ta’ ħajja u konsegwenzi rreparabbli’. Dan waqt li l-Gvern Ukran ħareġ messaġġi ta’ kondoljanzi lill-qraba tan-nies li tilfu ħajjithom.
Fl-istess ħin, il-Gvern tal-Ukrajna qed iwiegħed li jipprovdi appoġġ finanzjaru lill-vittmi tan-nirien u lil qrabathom.
//= $special ?>