Mexxejja minn madwar id-dinja nġabru fil-belt kapitali Franċiża, Pariġi, għas-summit tan-Nazzjonijiet Uniti, magħruf bħala COP21, dwar il-tibdil fil-klima.
L-iskop tal-konferenza hu biex ikun hemm bidla konkreta biex il-pajjiżi jibdew jużaw aktar enerġija li tiġġedded u jużaw anqas dik li tagħmel il-ħsara lill-klima.
B’kollox, negozjaturi minn 195 pajjiż se jkunu preżenti f’Pariġi għall-ġimagħtejn li ġejjin biex jippruvaw jilħqu ftehim biex inaqqsu l-ħruġ ta’ gassijiet li jagħmlu l-ħsara lill-klima dinjija.
Iżda qabel, il-mexxejja ta’ 147 pajjiż bdew jindirizzaw il-laqgħa bi stennija għad-diversi inizjattivi li mistennija jitħabbru.
Franza qalet li kważi l-gvernijiet kollha kienu elenkaw pjan biex jiġġieldu l-ħsara li qed issir lill-klima lil hinn mill-2020. Imma d-diplomatiċi ammettew li t-taħditiet mhux se jkunu faċli.
Il-President Amerikan Barack Obama, fil-ftuħ tal-konferenza, qal li din il-laqgħa tista’ tħoll jew torbot l-isforzi internazzjonali biex titrażżan iż-żieda li qed ikun hawn fit-temperatura tal-klima. Hu fakkar lil kulħadd li dak li se jsir f’din il-laqgħa kien għall-ġenerazzjonijiet li jmiss biex ikunu jistgħu jgawdu d-dinja. Hu qal li mar hu personalment hemmhekk għaliex mhux biss jagħraf il-problema, imma ried jagħmel xi ħaġa dwarha.
Mexxejja oħra indirizzaw lid-delegati lbieraħ, fosthom il-President Russu Vladimir Putin. Waqt in-negozjati qabel il-ftehim ta’ Kyoto, ir-Russja kienet l-aħħar pajjiż industrijalizzat li jirratifika l-ftehim u b’hekk seta’ jidħol fis-seħħ fl-2001. Putin ilbieraħ qal li d-dinja kellha prova li jekk wieħed irid, jista’ jkun hemm żvilupp ekonomiku u fl-istess waqt l-ambjent ikun trattat tajjeb.
Min-naħa l-oħra, il-President Ċiniż Xi Jinping qal li ma kienx jara l-konferenza ta’ Pariġi bħala xi ħaġa li tħoll jew torbot imma aktar bħala bidu ġdid. Hu żied li t-tibdil fil-klima kien imur lil hinn mill-fruntieri tal-pajjiżi, u kulħadd kellu jaħdem b’rabta ma’ din il-kwistjoni qabel ma tenna l-wegħda Ċiniża li pajjiżu jibda jnaqqas il-ħruġ tal-gassijiet perikolużi.
In-Nazzjonijiet Uniti qed timmira li ż-żieda fit-temperatura tad-dinja ma tkunx ta’ aktar minn żewġ gradi Celsius minn dik li kien hemm qabel l-era tal-industrijalizzazzjoni imma madwar 100 pajjiż, fil-maġġoranza fqar jew gżejjer, iridu li din tkun ta’ 1.5 grad Celsius.
U hu dan li mistenni jiddomina ħafna min-negozjati li jkunu qed isiru f’Pariġi.