L-Istati Uniti għadha kemm wissiet li l-logħob tat-tournament internazzjonali tal-futbol, Euro 2016, li jibdew fi Franza, fl-10 ta’ Ġunju, jistgħu jispiċċaw mira tat-terroristi.
Id-Dipartiment tal-Istat Amerikan f’Washington qal li l-ammont kbir ta’ turisti li se jżuru Franza u l-Ewropa matul is-sajf għandhom jippreżentaw ‘mira akbar’ għal militanti u gruppi terroristiċi.
Dan id-Dipartiment, permezz ta’ travel alert għal ċittadini Amerikani, wissa dwar ‘il-perikli ta’ attakki minn militanti madwar l-Ewropa’ u sostna li l-miri għal terroriżmu jistgħu jinkludu siti turistiċi, restoranti, ċentri kummerċjali u hubs tat-trasport.
Sar ukoll aċċenn partikolari għall-avvenimenti għall-massa importanti bħall-Euro 2016 li kapaċi ‘jattiraw il-qilla’ ta’ movimenti terroristiċi.
L-impenji tal-Euro 2016 idumu sat-12 ta’ Lulju, u l-logħob se jinqasam f’numru ta’ stadiums f’diversi bliet prinċipali ta’ Franza, magħrufa bħala host cities. L-ibliet magħżula, minbarra Pariġi, jinkludu fost oħrajn Marsilja, Lyon, Lille, Bordeaux u Toulouse.
Franza diġà tinsab taħt stat ta’ emerġenza wara l-attakki kordinati tat-13 ta’ Novembru, mill-ISIS, fil-qalba ta’ Pariġi, li kienu ħallew għexieren ta’ mejtin u midruba.
//= $special ?>