Talanqas ħames suldati tal-qawwiet tan-Nazzjonijiet Uniti fil-Mali nqatlu fi sparatura ta’ balal minn mortars fuq il-bażi tagħhom f’Kidal, lejn it-Tramuntana tal-pajjiż.
Intant, indarbu 30 oħra meta grupp ta’ militanti saqu vettura pakkjata bi splussivi direttament għal ġol-bażi ta’ Kidal, qabel attakkawha bl-isparar mill-mortars u armamenti awtomatiċi.
Il-grupp Ansar Dine, li qed jiġġieled gwerra qaddisa (jihad) fil-Mali, aktar tard assuma responsabbiltà għall-attakk li kien ikkundannat bla riservi mis-Segretarju-Ġenerali tan-NU Ban Ki-Moon.
In-Nazzjonijiet Uniti qed tipprova tirristawra l-paċi fit-Tramuntana tal-Mali li, fl-2012, kienet okkupata għal żmien minn militanti tal-movimenti tal-jihad u gruppi etniċi tat-tribu tat-Twareg.
Dawn il-militanti, li kellhom konnessjoni mal-grupp al-Qaeda u li, maż-żmien, kisruha mas-separatisti tat-Twareg, kienu tkeċċew mill-ibliet fit-Tramuntana tal-Mali wara l-intervent, fl-2013, ta’ qawwa taħt tmexxija Franċiża.
