Il-Prinċep Filippu aktar kmieni żar il-Pro-Katidral iddedikat lil San Pawl fil-Belt Valletta. Dan il-Katidral ilu mibni f’pajjiżna sa’ mill-1839 meta r-Reġina Adelaide, il-mara tar-Re William IV, poġġiet l-ewwel ġebla fil-post fejn qabel kien hemm il-Berġa tal-Ġermanja.
Dan il-katidral inbena għaliex qabel dak iż-żmien, il-komunità Anglikana f’Malta ma kelliex post ieħor fejn tiltaqa’ ħlief kamra fil-Palazz tal-Gran Mastru. Kien għalhekk li r-Reġina talbet lill-Gvern Ingliż biex itiha post biex tiffinanzja l-bini ta’ dan il-Katidral maestuż.
Il-Prinċep Filippu hu l-patrun tal-Anglikani f’Malta u għalekk din iż-żjara hi sinjifikanti b’mod speċjali għall-Anglikani f’Malta, li fuq wiċċhom kienet evidenti l-emozzjoni.
Barraminnhekk, din iż-żjara kienet sinjal tal-għaqda bejn il-Kristjani f’Malta, hekk kif mistieden kien hemm ukoll l-Arċisqof ta’ Malta Charles Scicluna. Filfatt, l-istess Prinċep irrimarka dan f’diskors li għamel.
