Madwar 12-il tank tal-gwerra Tork akkumpanjati mit-truppi qasmu l-fruntiera lejn is-Sirja f’offensiva kontra l-militanti tal-ISIS kif ukoll il-Kurdi.
Qabel, kien hemm bumbardament qalil kemm mill-art kif ukoll mill-ajru fl-inħawi madwar Jarablus.
Il-President Tork, Tayyip Erdogan, qal li fil-mira ta’ din l-offensiva kien hemm kemm l-ISIS kif ukoll ir-ribelli Kurdi. Dan peress li filwaqt li l-mira ewlenija tal-offensiva huma l-ġellieda tal-ISIS, it-Turkija trid tevita li r-ribelli Kurdi jokkupaw il-vojt li jkun tħalla mill-ISIS bil-konsegwenza li dawn imexxu territorju tul il-fruntiera Torka.
Din l-offensiva seħħet fl-isfond ta’ diversi attakki terroristiċi fit-Turkija li s-suspetti ewlenin huma li twettqu mill-ISIS.
