Komplew il-polemiċi dwar il-ftehim ta’ kummerċ ħieles li qed ikun negozjat bejn l-Istati Uniti u l-Unjoni Ewropea magħruf bħala Transatlantic Trade and Investment Partnership (TTIP).
Dwar dan l-organizzazzjoni Greenpeace żvelat li dokumenti sigrieti li kisbet juru li l-ftehim kien se jnaqqas il-livell ta’ protezzjoni tal-produzzjoni tal-ikel u l-ambjent fl-Ewropa.
Imma l-Kummissjoni Ewropea qalet li d-dokumenti li minnhom qed tikkwota l-Greenpeace kienu jirreferu għal pożizzjonijiet fin-negozjati u mhux ir-riżultat finali.
Il-Greenpeace hi fost dawk li qed jopponu għat-TTIP għax issostni li dan se jagħti wisq poter lin-negozji l-kbar għad-deteriment tal-konsumatur u l-gvernijiet nazzjonali.
Min-naħa l-oħra, dawk favur isostnu li permezz ta’ dan il-ftehim se jkun hemm gwadann ta’ 100 biljun kemm fl-Ewropa kif ukoll fl-Istati Uniti.
Il-fergħa tal-Greenpeace fl-Olanda lbieraħ ippubblikat 248 paġna ta’ dokumenti fuq il-websajt TTIP-leaks.org.
