Il-Perit Taljan Renzo Piano tqabbad mill-Prim Ministru Taljan Matteo Renzi biex jieħu ħsieb ir-rikostruzzjoni taz-zoni milquta mit-terremot tal-ġimgħa li għaddiet. Piano qal li fost l-ewwel affarijiet li għandhom isiru fl-Italja kien li jissaħħu l-liġijiet dwar il-bini, partikolarment biex dawn jifilħu għat-theżżiż kif ukoll biex wieħed ikollu moħħu mistrieħ dwar il-mod kif inhu mibni l-bini, kemm dak pubbliku kif ukoll il-privat. Piano għandu esperjenza kbira f’dan il-qasam peress li ħadem għal snin twal mal-UNESCO dwar kif wieħed jista’ jipproteġi l-bini antik minn diżastri naturali u r-rikostruzzjoni ta’ wara. Il-pjan tal-Gvern Taljan li tqabbad jieħu ħsieb Piano hu mifrux tul perjodu ta’ 50 sena, bi Piano jesprimi fiduċja li minkejja l-kobor ta’ dak li jrid isir, jekk kulħadd jiġbed ħabel wieħed jista’ jirnexxi.
It-terremot tal-24 ta’ Awwissu ħalla tal-anqas 390 persuna mejta u tal-anqas 3,000 bla saqaf fuq rashom, bl-irħula ta’ Amatrice, Accumoli u Pescara del Tronto jintlaqtu l-agħar.