Sirens Ritter Sport ikkonfermaw ir-raba’ post fil-Kampjonat Premier u l-ewwel post fir-Relegation Pool meta fl-aħħar partita tal-kampjonat għelbu lil Valletta McDonalds 10-9. Kollox ma’ kollox, ir-rebħa kienet meritata fejn speċjalment wara t-tieni sessjoni kienu aktar ċiniċi quddiem il-lasta, kompliċi wkoll iż-żewġ penalties lejn tmiem it-tieni sessjoni, li taw vantaġġ li bih Sirens setgħu jamministraw il-partita.
Min-naħa l-oħra l-Beltin kellhom l-okkażjoni li jispiċċaw l-istaġun fir-raba’ post iżda kienu kostretti li jirbħu din il-partita wara li kienu tilfu kontra Exiles. Valletta kellhom staġun inkonsistenti, fejn kellhom partiti pożittivi anki kontra l-ewwel tliet timijiet, iżda naqsu li jispikkaw f’partiti diretti.
