Infermiera Skoċċiża li spiċċat infettata bil-virus tal-Ebola waqt li kienet qed taħdem fi Sierra Leone ddaħħlet mill-ġdid fl-isolation unit ta’ sptar f’Londra wara li żviluppatilha kumplikazzjoni mhux tas-soltu.
Kelliema għall-NHS Greater Glasgow and Clyde, li joffri s-servizzi tal-isptar lill-komunitajiet u r-reġjun, ikkonfermaw li l-virus jinsab fl-infermiera, iżda qalu li dan kien ‘element li għad fadal mill-infezzjoni oriġinali’.
Mhux maħsub li l-infermiera, li jisimha Pauline Cafferkey(ritratt), tista’ tinfetta lin-nies f’din il-kundizzjoni. Intant, din il-mara ta’ 39 sena, li hi residenti ta’ South Lanarkshire, twasslet lura bl-ajruplan lejn l-isolation unit tar-Royal Free Hospital ta’ Londra.
Fil-bidu tas-sena, Cafferkey kienet damet kważi xahar rikoverata f’dik it-taqsima tal-isptar wara li mardet bl-Ebola, f’Diċembru li għadda.
Il-kelliema għall-NHS Greater Glasgow and Clyde qalu li l-infermiera, nhar it-Tlieta, iddaħħlet l-isptar fi Glasgow wara li ħassitha ma tiflaħx u hemm ingħatat it-trattament dovut fit-taqsima għall-mard li jittieħed. Hi, imbagħad, twasslet fir-Royal Free Hospital, bit-tobba jfissru ċ-ċirkostanzi tagħha bħala riżultat ta’ kumplikazzjoni dovuta għall-infezzjoni mill-virus tal-Ebola. Madankollu, l-aħħar bullettin sostna li l-livell ta’ sogru għall-pubbliku hu wieħed baxx ħafna.