L-eks-Kap Eżekuttiv ta’ Marks & Spencer Stuart Rose se jmexxi l-kampanja biex jikkonvinċi lill-elettorat tar-Renju Unit biex jibqa’ fl-Unjoni Ewropea.
Dan hekk kif issa bdiet tirranka l-kampanja għar-referendum dwar dan is-suġġett. Dan ir-referendum kien fil-manifest elettorali tal-Partit Konservattiv tal-Prim Ministru David Cameron u aktarx isir fl-2017, wara 40 sena ta’ sħubija.
Rose se jmexxi l-kampanja’Britain Stronger in Europe’. Il-kampanja għandha l-appoġġ tal-eks-Prim Ministri Ingliżi John Major, Tony Blair u Gordon Brown, kif ukoll diversi personalitajiet oħra Ingliżi.
Il-Prim Ministru Cameron qal li kien se jargumenta favur li l-pajjiż jibqa’ membru tal-Unjoni Ewropea sakemm hu jkun jista’ jinnegozja termini aħjar għas-sħubija tal-pajjiż.
Hemm żewġ gruppi li qed imexxu l-kampanja favur il-ħruġ, imlaqqma ‘Brexit’: ‘Vote Leave’ u ‘Leave.EU’. Fil-każ ta’ ‘Vote Leave’, hemm politiċi kemm Konservattivi kif ukoll Laburisti, kif ukoll Douglas Carswell, l-uniku membru parlamentari tal-UKIP. Il-grupp ‘Leave.EU’ hu ffinanzjat minn donatur sinjur tal-UKIP.
