Ma tbatti xejn it-tensjoni fil-peniżola Koreana. Diġà hemm ħafna tensjoni wara li fi tmiem il-ġimgħa li għaddiet il-Korea ta’ Fuq sparat rokit bi ksur tal-ħafna sanzjonijiet li diġà hemm kontriha min-Nazzjonijiet Uniti.
Issa t-Tnejn, il-Qawwa tal-Baħar tal-Korea t’Isfel fetħet in-nar kontra bastiment tal-gwerra Korean wara li dan qasam il-fruntiera marittima.
Il-Ministeru tad-Difiża f’Seoul qal li l-bastiment mir-reġim tal-Korea ta’ Fuq mal-ewwel dawwar ir-rotta wara li kienu sparati ħames tiri fid-direzzjoni tiegħu bħala twissija.
Il-fruntiera marittima bejn iż-żewġ pajjiżi m’għandiex l-għarfien tar-reġim f’Pyongyang li jsostni li dan sar mingħajr konsultazzjoni miegħu min-Nazzjonijiet Uniti wara l-Gwerra tal-Korea tas-snin Ħamsin.
Iż-żewġ naħat spiss jilmentaw li xi bastiment militari tan-naħa l-oħra jkun qasam din il-fruntiera marittima u fl-1999, fl-2002 u fl-2009 kien hemm inċidenti pjuttost serji.
Bħalissa hemm livell ta’ allert għoli fost il-forzi tas-sigurtà tal-Korea t’Isfel wara l-isparar tar-rokit tal-Ħadd. Sparar li l-Gvern ta’ Seoul qal kienet skuża biex ir-reġim ta’ Pyongyang jipprova teknoloġija għall-missili nukleari li jistgħu jaslu distanzi twal, fosthom sal-Istati Uniti.