L-Air Malta qed tħejji ruħha biex tiċċelebra l-40 anniversarju tagħha mit-titjira ta’ inawgurazzjoni. L-ewwel titjira tal-linja tal-ajru kienet minn Malta għal Londra, Heathrow, fl-1 ta’ April 1974.
Il-passiġġiera abbord l-ajruplan Boeing 720B kienu fil-parti l-kbira ġurnalisti u aġenti tal-ivjaġġar fuq titjira biex jiltaqgħu mal-kollegi Ingliżi tagħhom għal riċeviment ta’ sitt sigħat f’Londra.
Biex tfakkar l-okkażjoni, Air Malta qed tippjana għadd ta’ attivitajiet u inizjattivi, inkluża edizzjoni speċjali t’April tar-rivista tagħha abbord it-titjiriet, ‘Il-Bizzilla’.
Il-Kap Eżekuttiv tal-Air Malta Louis Giordimaina, emfasizza l-fatt li l-anniversarju tal-linja tal-ajru jaħbat ma’ sena ferm importanti għal Malta, li fiha ser tiċċelebra kisbiet storiċi importanti. “Dawn il-kisbiet ħallew impatt qawwi fuq il-Maltin u l-Għawdxin, u għamluna dak li aħna llum. F’dawn l-aħħar 40 sena l-Air Malta kienet strumentali fil-ftuħ ta’ swieq turistiċi ġodda u biex tgħaqqadna iktar minn qatt qabel mal-bqija tad-dinja. Dan ikkontribwixxa għall-iżvilupp ekonomiku u soċjali tal-gżejjer Maltin,” saħaq is-Sur Giordimaina.
Fl-ewwel sena tal-operat tagħha, l-Air Malta ġarret 53,459 passiġġier. Din iċ-ċifra annwali llum telgħet għal 1.7 miljun, bi kważi 50 miljun passiġġier li ġġarru tul l-aħħar 40 sena.
Din is-sena, il-komunità internazzjonali tal-avjazzjoni qed tfakkar ukoll il-100 anniversarju mit-twelid tal-avjazzjoni kummerċjali. L-ewwel titjira skedata ta’ linja tal-ajru kummerċjali saret fl-1 ta’ Jannar 1914 fi Florida, minn San Pietruburgu lejn Tampa.
Stampa 1: Il-Viċi Prim Ministru, Dr A. Buttigieg, waqt li jindirizza lill-mistednin preżenti għall-inawgurazzjoni ta’ Air Malta nhar il-31 ta’ Marzu 1974. Mix-xellug għal-lemin hemm Albert Mizzi – iċ-Chairman ta’ Air Malta, Sir Anthony Mamo – il-Gvernatur Ġenerali, il-Monsinjur Gonzi – Arċisqof ta’ Malta, u l-Marixall tal-Ajru Nur Khan, President tal-PIA.
Stampa 2: L-ekwipaġġ tal-Ewwel Titjira ta’ Air Malta mix-xellug Mario Genovese, bdot tal-PIA, Carmen Fenech Vander Weerden, bdot tal-PIA, RoseMarie Zammit, bdot tal-PIA, Dorothy Dalli Ulenhaut, bdot tal-PIA, Reggie DeBono u Norman Falzon.
Stampa 3: Il-passiġġiera tal-ewwel titjira ta’ Air Malta lejn Londra, Heathrow.
