Il-Gvern qed ikompli jistaħba fuq numru ta’ temi mportanti għal pajjiżna. Illum kien imiss lill-Ministru tal-Finanzi Edward Scicluna jistaħba wara recording biex jevita kull forma ta’ skrutinju pubbliku dwar x’qed jiġri eżatt fil-qasam tal-finanzi ta’ pajjiżna. Dan wara l-pubblikazzjoni ta’ ċifri li jqajmu aktar mistoqsijiet milli jagħtu tweġibiet.
Fi stqarrija f’isem il-Viċi Kap għall-Ħidma fil-Parlament u Kelliem għall-Ekonomija, l-Investiment u l-Intrapriżi ż-Żgħar Mario de Marco u l-Kelliem għall-Finanzi Tonio Fenech, il-Partit Nazzjonalista qal li ċ-ċifri ppubblikati llum mill-Eurostat juru li filwaqt li d-defiċit ta’ pajjiżna għall-2013 niżel għal 2.8% (madwar €200 miljun), id-dejn ta’ pajjiżna kiber b’5.2% (€373 miljun). Il-Gvern għandu jagħti spjegazzjoni ċara għal din id-diskrepanza sostanzjali fiċ-ċifri.
Il-PN qal li l-Ministru Scicluna għandu jagħti dettalji dwar kif u fejn qed jiġi rrappurtat it-telf li għamlet l-Arriva u li issa għadda fuq il-Gvern, li s’issa għadu ma jridx jgħid kemm hu. Il-Gvern għandu jgħid ukoll kif se jkun qed jagħmel tajjeb għas-sussidju lill-kumpanija l-ġdida li qed topera s-servizz tat-trasport pubbliku, li minn €10 miljun se jitla’ b’mod drastiku. Filwaqt li jidher ċar li l-Gvern għandu l-flus għall-ħela u l-perkaċċi għan-nies tal-qalba, jidher li dan ma jgħoddx għas-settur tas-saħħa, li jidher li hu s-settur li jinsab fil-mira tal-Ministru Scicluna biex jilħaq il-miri tiegħu.
Fid-dawl tad-dubji kollha mqajma mill-istatistika ppubblikata llum u l-messaġġ tal-Ministru għall-Finanzi, il-PN stieden lil Edward Scicluna jew lill-Prim Ministru biex b’rispett tat-trasparenza u l-kontabbiltà li tant jiftaħar bihom Gvern Laburista, isejjaħ konferenza tal-aħbarijiet li tagħti l-opportunità lill-mezzi tax-xandir biex jagħmlu xogħolhom, filwaqt li jiċċara d-dubji serji li tqajmu mill-ftit dettalji ppubblikati llum.
Fil-qasam tat-tmexxija tal-finanzi ta’ pajjiżna, Malta mhix sejra aħjar milli kienet sena ilu. Dan hu sinjal ċar tal-inkompetenza tal-Ministru Edward Scicluna, ittemm tgħid l-istqarrija tal-PN.
