Il-ktieb “L-Istorja tal-Papa Ġwanni Pawlu II” ġie deskritt minn prelati bħala ktieb eċċellenti li jwassal il-messaġġ qaddis ta’ mħabba u maħfra minn Papa Ġwanni Pawlu II. Dan għaliex huma qalu li l-ktieb sar b’mod li jiftiehem biex it-tfal, u anki l-kbar, ikunu aktar eqreb ta’ dan il-Papa li nhar il-Ħadd li ġej se jiġi kanonizzat u dikjarat qaddis.
Il-ktieb, li ġie pubblikat minn Kite Group kien ippreżentat lil prelati waqt laqgħat li saru f’Ruma.
Il-ktieb intlaqa’ tajjeb ħafna f’laqgħat separati li saru ma’ Mons Slavomir Oder, Postulatur tal-Kawża tal-Kanonizzazzjoni ta’ Ġwanni Pawlu II, il-Kardinal Jose’ Saraiva Martins, il-Kardinal Camillo Ruini li serva bħala Vigarju Ġenerali ta’ Ruma fi żmien il-Papa Ġwanni Pawlu II, il-Kardinal Tarcisio Bertone li serva għal diversi snin bħala Segretarju tal-Istat tal-Vatikan kif ukoll mal-Kardinal Malti Prospero Grech.
Il-Kardinal Saraiva Martins li tul il-pontifikat tal-Papa Ġwanni Pawlu II kien il-Prefett tal-Kongregazzjoni tal-Kawża tal-Qaddisin u li fi żmienu kien dikjarat qaddis Dun Ġorġ Preca, qal li dan hu ktieb li se jkompli jwassal il-messaġġ qaddis ta’ Ġwanni Pawlu II. Il-Kardinal Bertone min-naħa tiegħu esprima l-apprezzament tiegħu għall-inizjattiva ta’ Kite Group li jkun ippublikat dan il-ktieb u saħaq li Ġwanni Pawlu II kien Papa vicin it-tfal, u b’qalb ta’ tifel.
L-istess kliem ta’ apprezzament u tifħir twasslu mill-Kardinal Ruini li esprima sodisfazzjon għall-fatt li storja daqstant importanti ta’ mħabba u maħfra issa ġiet ippreżentata b’mod li jkun miftiehem mit-tfal. Il-Kardinal Malti Prospero Grech qal li dan il-ktieb hu sors importanti ta’ informazzjoni għal kulħadd.
Tul iz-zjara f’Ruma saret ukoll intervista mal-awtur tal-ktieb u ma’ rapprezentant tal-pubblikaturi Kite Group mill-agenzija awtoreveli Rome Reports.
Il-ktieb L-Istorja tal-Papa Ġwanni Pawlu II hu miktub minn Frank Zammit u addattat għat-tfal minn Rita Saliba. F’dan il-ktieb ta’ 100 paġna hemm 45 illustrazzjoni bil-kulur ta’ ħajjet il-Papa Ġwanni Pawlu II, mit-tfulija sal-mirkali li saru bl-interċessjoni tiegħu. L-illustrazzjonijiet saru minn David Schembri.
Il-ktieb jinsab għal bejgħ minn fuq www.kitegroup.com.mt jew mill-ħwienet tal-kotba.
