Taħt it-tmexxija ta’ Joseph Muscat, Malta waqgħet żewġ postijiet fir-rata tal-qgħad fl-Ewropa
Wara 14-il xahar ta’ Gvern Laburista mmexxi mill-Prim Ministru Joseph Muscat, in-numru ta’ persuni li jinsabu mingħajr xogħol f’pajjiżna kompla jikber fl-aħħar xhur, hekk kif ikkonfermat mill-aġenzija Eurostat. B’referenza għal dan, il-Partit Nazzjonalista qal li filwaqt li sena ilu, il-Prim Ministru Muscat wiret pajjiż bir-raba’ l-aktar rata baxxa ta’ qgħad fl-Unjoni Ewropea, l-istatistika ppubblikata mill-Eurostat tikkonferma li Malta waqgħet lura b’żewġ postijiet, biex issa tinsab fis-sitt post bl-istess perċentwal tar-Renju Unit (6.8%).
Il-Partit Nazzjonalista qal li l-istatistika ppubblikata l-Ġimgħa mill-Eurostat tirrappreżenta żieda fil-qgħad meta mqabbla mas-6.4% li rreġistra pajjiżna fl-istess xahar is-sena li għaddiet. Fl-istess perjodu, il-qgħad fl-Unjoni Ewropea naqas. Skont il-Partit Nazzjonalista din hi konferma ċara li ż-żieda fil-qgħad f’pajjiżna mhi marbuta ma’ ebda ċirkostanza internazzjonali.
Filwaqt li hu diżappuntanti li l-Gvern Laburista ħela 14-il xahar biex joħroġ bi strateġija fil-qasam tax-xogħol, il-Partit Nazzjonalista qal li jilqa’ l-fatt li fl-aħħar ġie ppubblikat dokument li jista’ jiftaħ diskussjoni dwar ix-xogħol f’pajjiżna. Il-Partit Nazzjonalista awgura li dan id-dokument ta’ politika jqajjem diskussjoni fil-pajjiż sabiex flimkien infasslu t-triq ’il quddiem għal xogħol aħjar, bis-sehem sħiħ tal-imsieħba soċjali.
Madankollu, dak li ppreżenta llum il-Prim Ministru Muscat, skont il-Partit Nazzjonalista dan mhuwiex pjan ekonomiku għall-ħolqien ta’ impjiegi f’setturi ġodda kif hemm bżonn. Il-Partit Nazzjonalista qal li l-Prim Ministru hu mistenni jsib soluzzjonijiet minnufih għat-8,000 persuna li jinsabu mingħajr xogħol u li jixtiequ jaħdmu u mhux biss għall-ħbieb tal-qalba ta’ Muscat. “Dan biex kif ma għeriqniex fl-agħar maltemp, pajjiżna issa ma jegħriqx fil-bnazzi.” ittemm tgħid l-istqarrija tal-Partit Nazzjonalista.
