Gerardo Martino irriżenja minn kowċ ta’ Barcelona bi ftehim reċiproku wara li naqas milli jirbaħ La Liga. Barcelona riedu jegħlbu lil Atletico fl-aħħar logħba biex jirbħu l-kampjonat imma spiċċaw draw 1-1 u minflok kienu Atletico li rebħu La Liga.
Dan kien ifisser li Barcelona spiċċaw l-istaġun mingħajr rebħ ta’ unur għall-ewwel darba sa mill-2007-08. Martino li għandu 51 sena qal li jiddispjaċih li ma kienx kapaċi jipprovdi unur lill-klabb u rringrazzja lill-istess klabb tal-fiduċja li wera fih. Martino ħa post Tito Vilanova f’Lulju tas-sena l-oħra u kien iffirma kuntratt ta’ sentejn f’Nou Camp.
“Jiddispjaċini ħafna li ma lħaqtx il-miri li dan il-klabb minn dejjem poġġa quddiemu. Dawn huma plejers kbar li għamluni kburi u nirringrazzjahom mill-qalb,” qal Martino.
L-eks plejer ta’ Barcelona Luis Enrique li se jitlaq minn kowċ ta’ Celta Vigo fis-sajf qed jissemma minflok Martino.
RENARD – Sadanittant anke l-kowċ ta’ Sochaux fi Franza Herve Renard ħabbar li se jitlaq minn Stade Auguste Bonal wara li l-klabb ġie relegat għat-tieni diviżjoni għall-ewwel darba wara 13-il sena b’telfa 3-0 għand Evian TG fl-aħħar ġurnata tal-Kampjonat.
