Hekk kif fadal ġimgħa biss għall-elezzjoni tal-24 ta’ Mejju, it-tmexxija tal-Partit Laburista jinsab taħt pressjoni kbira kaġunata minn rabja li ġejja mingħand għadd ta’ partitarji Laburisti minħabba li baqgħu mingħajr dak li kienu mwiegħda qabel l-elezzjoni.
Il-gazzetta il-Mument żvelat kif tim ta’ uffiċjali li l-impjieg tagħhom mal-gvern huwa ta’ customer care fil-Ministeri, qegħdin jaħdmu miċ-Ċentru Nazzjonali Laburista. Dawn l-uffiċjali tal-customer care impjegati fil-Ministeri ilhom għal dawn l-aħħar tliet ġimgħat jaħdmu miċ-Ċentru Nazzjonali Laburista minħabba li għadd ġmielu ta’ partitarji Laburisti huma diżullużi bit-tmexxija tal-Gvern Laburista wara li qegħdin jaraw li dawk li “huma l-aktar fil-qalba tal-Partit” ingħataw xogħol u konsulenzi b’eluf ta’ ewro waqt li huma baqgħu ma nqdewx minkejja l-wegħdiet li sarulhom qabel l-elezzjoni tal-2013.
Skont dak ippublikat fil-gazzetta il-Mument, dan ix-xogħol qiegħed isir mit-tieni sular taċ-Ċentru Nazzjonali Laburista, għalkemm xogħol ieħor qed isir ukoll mir-raba’ sular fejn minn dan is-sular, fost il-ħidma qegħdin isiru sforzi kbar biex jinsabu postijiet tax-xogħol għal partitarji Laburisti li kienu mwiegħda impjieg qabel l-elezzjoni ġenerali.
Id-deċiżjoni li uffiċjal minn kważi kull Ministeru, impjegat fit-Taqsima tal-Customer Care jintbagħat jaħdem miċ-Ċentru Nazzjonali Laburista ttieħdet hekk kif għadd ta’ partitarji Laburisti mhux biss kienu qegħdin jirritornaw it-tessera, iżda wkoll id-dokument tal-vot.
il-mument żvelat każi fejn partitarji Laburisti rritornaw għadd ġmielu ta’ dokumenti tal-voti. Dawn id-dokumenti għaddew minnufih lil żewġ uffiċjali għolja tal-Partit Laburista li min-naħa tagħhom taw struzzjonijiet biex id-dokumenti tal-voti jinġabru mill-persuni rispettivi.
il-mument għandu informazzjoni li kemm Toni Abela, id-Deputat Mexxej tal-Partit Laburista għall-Affarijiet tal-Partit kif ukoll Daniel Micallef, il-President tal-Partit Laburista jafu sew bix-xogħol li qegħdin jagħmlu uffiċjali tal-customer care tal-Ministeri miċ-Ċentru Nazzjonali Laburista.
