Il-kandidat tal-Partit Nazzjonalista għall-elezzjoni tal-Parlament Ewropew Ray Buġeja wiegħed li, jekk ikun elett, se jagħmel minn kollox u jgħin biex il-YMCA Homeless, l-NGO li taħdem b’risq min m’għandux dar, tisfrutta l-opportunitajiet li toffri l-Unjoni Ewropea.
Fi blokk ta’ appartamenti tal-privat fi Triq San Nikola l-Belt, li jilqa’ 11-il resident, Ray Bugeja ntlaqa’ mic-Chairman tal-YMCA Jean Paul Mifsud u nghata taghrif dwar il-qagħda ta’ min qed ifittex kenn mingħand il-YMCA. Ray Bugeja żar l-appartamenti f’dan il-blokk u tkellem ma’ uħud mir-residenti.
Mistoqsi mill-kandidat Nazzjonalista kif il-YMCA tiffinanzja ruħha, Jean Paul Mifsud spjega li l-Bagit allokat għal din is-sena żdied minn 35 fil-mija għal 60 fil-mija biex din is-sena jammonta għal €400,000. Hu qal li jsiru wkoll attivitajiet ta’ ġbir ta’ fondi waqt li l-NGO tikseb ukoll għajnuna mill-Malta Community Chest Fund. S’issa l-YMCA għadha ma bbenefikat xejn mill-Unjoni Ewropea.
Ray Bugeja stqarr li r-rwol ta’ Ewro Parlamentari, fost oħrajn, hu li jfittex l-aħjar toroq għall-allokazzjoni ta’ fondi lil min irid jisfrutta l-vantaġġi li toffri l-Unjoni Ewropea.
Il-kandidat Nazzjonalista għall-Parlament Ewropew faħħar ix-xogħol kbir li tagħmel il-YMCA u sostna li din l-organizzazzjoni tista’ tgawdi mill-beneficcji tal-Fond Socjali Ewropew.
Ray Bugeja tkellem dwar l-importanza li MEP iservi ta’ pont bejn dak li qed jiġri f’Malta u l-opportunitajiet li hemm fl-Unjoni Ewropea. Qal li r-rwol tiegħu, jekk ikun elett, irid ikun li jifhem iżjed il-problemi u t-tħassib ta’ dak li jkun, f’dan il-kaz tal-YMCA, u jittraduċihom f’soluzzjonijiet konkreti.
Il-kandidat Nazzjonalista ltaqa’ mal-istaff u mal-voluntieri ta’ YMCA u waqt li rringrazzjahom tal-ħidma ma’ min hu vulnerabbli, saħaq fuq l-importanza li organizzazzjoni bħalma hi l-YMCA tkun strutturata abbażi ta’ sħubija bejn il-gvern u l-privat.
Il-YMCA Homeless tgħin eluf ta’ persuni kull sena u bħalissa qed tistinka biex tittrasferixxi ruħha u taħdem minn dar tal-Gvern fl-Imsida li se tkun qed tilqa’ fiha madwar 30 resident.
