Nofs il-ħaddiema tal-kumpanija British American Tobacco, li twaqqfet fl-2007 minflok il-kumpanija Central Cigarettes, spiċċaw bla xogħol wara li tkeċċew fl-aħħar jiem. Fi tweġibiet għall-mistoqsijiet ta’ MaltaRightNow.com, rappreżentant tal-kumpanija ma ċaħadx li tkeċċew 15-il impjegat tal-kumpanija, iżda qal li l-kumpanija għaddejja minn proċess ta’ ristrutturar. Qal biss li għaddejjin taħdidiet ma’ kumpanija oħra lokali, Salvo Grima Group, bil-għan li ż-żewġ kumpaniji jingħaqdu. Madankollu, dawn it-taħdidiet mhux mistennija jkunu konklużi qabel Ottubru li ġej.
Il-ġurnal The Malta Independent ukoll ikkonferma t-tkeċċija ta’ dawn il-15-il impjegat, filwaqt li l-ġurnal The Times of Malta esprima dubji dwar il-futur ta’ dawn il-15-il persuna. Madankollu, l-GWU kkonfermat li għaddejjin taħdidiet dwar il-futur ta’ dawn il-persuni. Informazzjoni li għandna tgħid ukoll li d-deċiżjoni li jitkeċċew dawn il-15-il ħaddiem ittieħdet u diġà ġiet ikkomunikata lill-ħaddiema.
Sadanittant, MaltaRightNow.com jinsab f’pożizzjoni jikkonferma li l-kumpanija Nylon Knitting mhix qed iġġedded il-kuntratti tal-ħaddiema tagħha, filwaqt li dawk li qed jitilqu mhux qed jiġu sostitwiti. Kif anke spjegat mal-ġurnal The Times of Malta, il-kumpanija qalet li ħadet din id-deċiżjoni għad-detriment tal-impjegati tagħha għax fl-aħħar xhur naqsilha l-bejgħ u l-kumpanija m’għadhiex b’saħħitha kif kienet qabel. Ir-rappreżentant tal-kumpanija qal li l-kumpanija mhix f’periklu li tagħlaq, iżda mhix kuntenta kif sejrin l-affarijiet għax is-sitwazzjoni nbidlet minn dik li kienet qabel.
