Skond il-kumpanija Repucom, kumpanija li tispeċjalizza fir-riċerka ta’ bejgħ fid-dinja tal-isport, il-winger ta’ Real Madrid Cristiano Ronaldo hu l-aktar futboler li jġib bejgħ. Ronaldo għeleb l-isfida tal-koppja ta’ Barcelona Lionel Messi u Gerard Pique li spiċċaw fit-tieni u fit-tielet post rispettivament. Kontra kull mistenni, fir-raba’ post ta’ din il-lista wieħed isib lill-attakkant ta’ Chelsea Fernando Torres. L-attakkant Ingliż ta’ Man Utd Wayne Rooney qiegħed fil-ħames post.
Fi tmiem il-ġimgħa li għaddiet Ronaldo għen lil Real Madrid jirbħu l-10 Champions League fl-istorja tagħhom meta fil-finali għelbu lil Atletico Madrid. F’Jannar li għadda Ronaldo rebaħ il-Ballun tad-Deheb tal-FIFA u ftit tal-ġimgħat oħra se jkun qed jikkompeti fit-Tazza tad-Dinja mal-Portugall. Skont l-istatistika ta’ Repucom Ronaldo għandu 82 miljun partitarju fuq is-social network ta’ Facebook u 26 miljun fuq Twitter. Ronaldo, li għandu 29 sena hu magħruf ma’ 83.9% tal-popolazzjoni tad-dinja. Fit-tieni post ta’ din il-lista hemm Lionel Messi, rebbieħ ta’ erba’ Blalen tad-Deheb tal-FIFA u plejer li għandu salarju ta’ 16-il miljun lira sterlina fis-sena
Wieħed jista’ jqis li l-fatt li d-difensur Pique qiegħed fit-tielet post ta’ din il-lista bħala sospriża. Fl-2008 Pique kien ħalla lil Man Utd u ingħaqad ma’ Barcelona fejn magħhom rebaħ diversi unuri. Barra minn hekk, mill-2008 ‘l hawn Pique rebaħ il-Euro 2008 ma’ Spanja, it-Tazza tad-Dinja tal-2010 fl-Afrika t’Isfel u anke l-Euro 2012. Il-fatt li Pique hu miżżewweġ lill-kantanta popolari Shakira ikompli jżid mal-popolarita` tiegħu. Aktar minn 58% tal-popolazzjoni tad-dinja taf b’Pique filwaqt li fi Spanja 97% tal-popolazzjoni taf bl-eks player ta’ Man Utd.
Fis-seba’ post tal-klassifika wieħed isib lil Neymar, player Brażiljan li fis-sajf li għadda ingħaqad ma’ Barcelona. Neymar hu wieħed mill-aktar players popolari fil-Brażil u s-sena li għaddiet kien wieħed mill-aktar players strumentali fit-tim nazzjonali li rebaħ it-Tazza tal-Konfederazzjonijiet. Fil-lista, minbarra Torres u Pique hemm żewġ players Spanjoli oħra. Andres Iniesta ta’ Barcelona qiegħed fis-sitt post filwaqt li l-goalkeeper ta’ Real Iker Casillas qiegħed fit-tmien post. Zlatan Ibrahimovic, player Żvediż li attwalment qiegħed ma’ PSG qiegħed fid-disa’ post filwaqt li l-eks player leġġendarju ta’ Arsenal, Thierry Henry qiegħed fl-10 post. Il-fatt li Henry ilu li ħalla l-Ewropa u mar jilgħab fl-Istati Uniti u xorta hu daqstant popolari juri kemm dan bena fama mill-aqwa fis-snin li matulhom kien jilgħab mal-Gunners.
