Malta Origin……………….38
Stompers……………………34
Malta Origin: (D. Groves 4, P. Debono, S. Keep tries; S. Keep 7 goals)
Stompers: (M. Spiteri 2, M. Attard, A. Camilleri, D. Cerketa, J. Ellul, A. Frizzi tries; M. Attard 3 goals)
Referee: A.Markovic
F’logħba mhux daqstant entusjażmanti li ntlagħbet fil-ground tal-Melita, Malta Origin għamlu biżżejjed biex għelbu lil Stompers u rebħu l-ewwel unur tar-Rugby League dan l-istaġun, il-MRL Super Cup meta ħarġu rebieħa 38-34.
Din il-logħba laqqgħet kontra xulxin liċ-Champions tas-sena l-oħra kontra r-rebbieħa tat-Tazza f’dik li issa jidher li qed issir rivalita` kbira bejn it-tnejn fejn Stompers kien ukoll l-aħħar tim li rebaħ il-kampjonat lokali qabel Malta Origin l-istaġun li għadda.
Imma kien il-prop Daniel Groves li għamel id-differenza hekk kif il-plejer Ingliż kiseb erba’ tries u ħadem bla heda fid-difiża kif l-istess għamlu sħabu.
Pete Debono u Branton Bonello wkoll kellhom wirja mill-aqwa għar-rebbieħa u l-isfidanti diretti tagħhom Dragan Cerketa u Malcolm Attard kienu fl-aqwa tagħhom.
Matul il-logħba ż-żewġ naħat donnhom kienu ferm eċċitanti u bdew jiżbaljaw affarijiet bażiċi fil-logħba bħalma huma passaġġi, daħliet u ħtif tal-ballun waqt li kellhom biss try wieħed kull wieħed u sal-mistrieħ l-iskor kien 22-18 għal Stompers.
Imma meta kien fadal biss kwarta għal tmiem il-logħba, Stompers tilfu lill-attakkant internazzjonali Malti Malcolm Attard wara li weġġa’ l-minkeb u kellu joħroġ.
Ftit wara kien it-Taljan Alesandro Frizzi li tniżżel fir-rapport tar-referee talli ta’ daqqa bis-sieq lil plejer avversarju u bl-iskor 30-30 seba’ minuti mit-tmiem kien Sam Keep li skorja minn penalty minn 35 metru u poġġa lil Malta Origin fil-vantaġġ. Wara dan Malta Origin għamlu try oħra u aċċertaw mir-rebħa anke jekk fil-ħin li kien fadal għat-tisfira finali Stompers kisbu erba’ punt li iżda ma kienux biżżejjed.
