Il-Pulizija għandom problema għaliex mhux imħarrġa u m’għandomx għarfien biżżejjed dwar kif jitrattaw każi t’abbuż fuq anzjani, tant li meta anzjan imur jirraporta każ t’abbuż, il-pulizija jikkunsidraw is-sitwazzjoni bħal dik ta’ persuna iżgħar fl-eta’.
Trid tinbidel ukoll il-liġi għaliex għandna sitwazzjoni fejn anzjan li jkun abbużat, speċjalment abbuż fil-familja stess, wara li jittieħdu passi ma jkollux triq oħra ħlief li jerġa’ jmur lura fl-ambjent fejn kien qabel.
Qal dan id-Direttur tal-Istitut Internazzjonali tal-Anzjanita’ f’pajjiżna Marvin Formosa waqt preżentazzjoni ta’ sett ta’ kotba lil-librerija tal-Universita’ ta’ Malta.
L-Istitut għamel din il-preżentazzjoni biex jikkommemora l-Jum Dinji tal-Għarfien dwar l-Abbuż fuq l-Anzjani ċċelebrat fil-15 ta’ Ġunju.
Waqt laqgħa mat-tmexxija tal-librerija, Formosa qal li d-dinja qed tesperjenza sfida hekk kif il-popolazzjoni ta’ dawk li għandom sittin sena jew iktar żdiedet minn 542 miljun fl-1995 u mistennija titla’ għal 1.2 biljuni fl-2025.
Hu qal li l-Organizzazzjoni Dinjija tas-Saħħa qed tistma li bejn 4 u 6% tal-anzjani huma suġġetti għal xi forma jew oħra ta’ abbuż. Hu għalhekk, qal Formosa, li l-Istitut li hu jmexxi qed jgħaddi dawn il-kotba lill-Universita’ bl-għan li jiżdied l-għarfien dwar il-problema tal-abbuż fuq l-anzjani.
Minn naħa tiegħu Kevin Ellul, Direttur Amministrattiv tal-librerija tal-Universita’ ta’ Malta rringrazzja lil dan is-sit għal din id-donazzjoni, li ddeskriviha bħala waħda importanti għaliex dawn il-kobta jitrattaw suġġett delikat li hawn bżonn iktar għarfien dwaru.
