Il-Union Ħaddiema Magħqudin u l-Union tal-Padjatristi ħarġu direttivi konġunti li permezz tagħhom twaqqfu s-servizzi ta’ kura għas-swaba u d-dwiefer mill-padjatristi minħabba problemi ta’ saħħa u nuqqasijiet oħra.
Fi stqarrija konġunta l-UHM u l-Union tal-Podjatristi sostnew li dan qed isir minhabba li m’humiex jittieħdu passi biex ikunu solvuti diversi problemi fis-settur tas-saħħa fejn xi ġimgħat ilu minħabba eżerċizzju biex jitnaqqsu l-ispejjeż, ittieħdet deċiżjoni dwar sterelizzar ta’ strumenti fl-Isptar Mater Dei li tista’ twassal għall-kontaminazzjoni fis-swali. Din il-proċedura qed twassal biex jinkisru l-kodiċi professjonali u ta’ etika tal-padjatristi.
Il-UĦM u l-Union tal-Padjatristi sostnew li f’ċertu centri tas-saħħa l-apparat meħtieġ għall-kura tas-swaba u d-dwiefer, partikolarment fost dawk li jbatu bid-dijabete, hu inqas minn kwart ta’ dak li hu meħtieg kuljum. F’numru ta’ postijiet oħra, l-apparat hu mkisser jww ma jistax jintuza minħabba li ilu ma jinbidel.
Iż-żewġ unions qalu li fil-passat is-sitwazzjoni kienet iffaċċjata b’miżuri temporanji bil-konsegwenza li l-problema twalet u għalhekk jehtieg soluzzjonjiet fit-tul fl-interess tal-pazjent u ta’ min jikkurah.
