Il-Korp tal-Pulizija issa għandu kelba ġdida, bl-isem ta’ Ziggy, li se tkun qed tintuża bħala parti minn programm tgħammir biex il-korp tal-Pulizija jkollu l-klieb tiegħu u b’hekk jiġu ffrankati l-ispejjeż biex dawn jinxtraw minn barra.
Ziggy, kelba tar-razza Belgian Shepherd li għandha erba’ snin, kienet ippreżentata lill-Korp tal-Pulizija waqt konferenza tal-aħbarijiet li saret fl-Ajruport l-antik f’Ħal Luqa.
Marco Spiteri, President tal-Malta Association of Airfreight Forwarders, l-assoċjazzjoni li fdiet l-ispejjeż tal-vjaġġ ta’ din il-kelba mill-Awstrija lejn Malta, qal li għall-assoċjazzjoni dan il-ġest hu turija ta’ apprezzament lejn il-Korp tal-Pulizija.
Dan għaliex flimkien, il-korp u l-assoċjazzjoni, il-Korp tal-Pulizija u d-dwana kif ukoll il-kumpaniji tal-linji tal-ajru jaħdmu id f’id biex jiżguraw ħidma importanti għall-pajjiżi rispettivi fejn joperaw fihom.
Marco Spiteri rringrazzja wkoll lill-Uffiċċju tal-Sigurta’ fl-Ajruport Internazzjonali ta’ Malta u qal li huma kienu strumentali biex ġie stabbilit kuntatt biex din il-kelba setgħet tasal f’pajjiżna.
Klieb bħal Ziggy jintużaw għal numru ta’ operazzjonijiet mill-korp tal-Pulizija fosthom għat-tiftix tal-isplussiv, drogi, persuni mfittxija mill-pulizija, armi kif ukoll biex jiġu kkontrollati l-folol jew waqt xi operazzjoni biex jinqabdu l-kriminali.
