Għas-sitt sena konsekuttiva d-Dar tal-Providenza se ttella’ l-maratona ta’ volleyball li se tkun inawgurata mill-President ta’ Malta Marie Louise Coleiro Preca nhar il-Ġimgħa 4 ta’ Lulju fil-5.30 pm u tiġi fi tmiemha nhar il-Ħadd 6 ta’ Lulju f’nofsillejl wara 53 siegħa ta’ logħob kontinwu ta’ volleyball.
Dan tħabbar waqt konferenza tal-aħbarijiet indirizzata minn Fr Martin Micallef, Direttur tad-Dar tal-Providenza, li toffri servizzi residenzjali temporanji u fit-tul lil numru ta’ persuni b’diżabilta’ f’ambjent li jixbah lil dak tal-familja u li jkabbar u jimmassimizza l-abbiltajiet tagħhom biex b’hekk huma jkunu jistgħu jipparteċipaw b’mod sħiħ fis-soċjeta’.
Fr. Martin semma’ numru ta’ djar u proġetti li tieħu ħsieb id-Dar tal-Providenza kif ukoll proġetti ppjanati għall-futur fosthom ħolma li jsir pool terapewtiku, dar residenzjali ġdida f’Ħaż-Żabbar kif ukoll iktar xogħol ta’ tiswija fid-Dar tal-Providenza stess.
Qal ukoll li din il-maratona għandha wkoll żewġ għanijiet oħra, li tinċentiva l-volontarjat u tħeġġeġ iktar nies jipprattikaw xi sport.
Minn naħa tagħha Michelle Muscat, chairperson tal-Marygold Foundation żaret ix-xogħol ta’ rinovazzjoni li sar fil-kċina tar-residenza. Hi wiegħdet li l-isponsor ewlieni ta’ din il-maratona, il-Bank of Valletta, se jkompli jgħin f’attivitajiet u lil għaqdiet filantropiċi li ddeskriviethom bħala imprezzabbli għas-soċjeta’.
Emmanuel Zammit, Chairperson tal-Kumitat organizzattiv ta’ din il-maratona qal li din is-sena qed jieħdu sehem madwar 300 voluntier, bejn plejers, organizzaturi u helpers. Hu esprima s-sodisfazzjon tiegħu li għal numru mdaqqas minn dawn it-300 mitt voluntier din se tkun l-ewwel darba li qed jgħinu lid-Dar tal-Providenza.
