Żewġ żgħażagħ Tuneżini kienu mixlijin quddiem il-Maġistrat Natasha Galea Sciberras li serqu ammonti ta’ flus minn karozzi pparkjati u li kienu nvoluti fi ġlieda ma’ tliet Somali f’Birżebbuġa.
Mahdi Warfilli ta’ 23 sena, u Mohamed Idris Magdoub ta’ 18-il sena, li huma t-tnejn minn Tunis, residenti Birżebbuġa kienu mixlijin li serqu l-flus ta’ Domenic Briffa u Raymond Farrugia u li għamlu ħsara fuq karozzi propjeta’ taż-żewġt irġiel u erba’ persuni oħra.
L-akkużati, li jagħmlu xogħol ta’ kisi u tikħil kienu mixlijin ukoll li ferew serjament lil Yaasin Aweis Isxaaq, Mahdi Burgele Ali u Abdi Salaan Mahamad Abtidon, li lkoll huma mis-Somalia. Mahdi Warfilli waħdu ġie mixli li kellu fil-pusses tiegħu sikkina mingħajr liċenzja valida.
L-Avukat tal-għajnuna legali Alessando Lia talab lill-Qorti għall-ħelsien mill-arrest tal-akkużati. Huwa argumenta li l-irġiel ma kienux jaf ta’ min kienu l-karozzi u għalhekk ma jistgħux jikkontaminaw ix-xhieda billi jkellmuhom.
Madankollu l-Prosekuzzjoni mmexxija mill-Ispetturi Johann Fenech uMelvyn Camilleri talbet lill-Qorti biex ma tilqax it-talba tad-difiża minħabba li t-Tuneżini joqgħodu biss kantuniera l-bogħod mis-Somali.
Il-Maġistrat Galea Sciberras laqgħet it-talba tad-difiża fuq garanzija personali ta’ €7,000. L-irġiel iridu jiffirmaw fl-Għassa tal-Pulizija ta’ Birżebbuga darbtejn kuljum u li jridu jkunu d-dar sa mhux aktar tard mit-8.00 pm.
