Dedikazzjoni u impenn huma żewġ karatteristici li l-għalliema taċ-Ċentru ta’ Riżorsa Sekondarja, Guardian Angel, joffru ta’ kuljum lill-istudenti tagħhom.
Din is-sena dan ic-centru qed jiccelebra l-50 sena mill-ftuh tieghu u biex ikun iċċelebrat dan l-anniversarju l-iskola organizzat attivita’ msejħa “Niccelebraw u Nirriciklaw”. Attivita’ intiża li tgħin lill-istudenti jibqgħu jaħdmu fuq it-tema li dejjem imxew magħha matul din is-sena skolastika, dik li ngħixu b’saħħitna meta nghixu f’ambjent nadif.
Il-kap tar-Resource Centre Joanne Mercieca spjegat kif f’din l-iskola hemm diversi riżorsi u faċilitajiet għal persuni b’diżabilta’ li wieħed ma jsibhomx fl-iskejjel l-oħra tal-Gvern, jiġifieri fl-iskejjel mainstream.
Matul l-attivita’ l-istudenti u l-għalliema ħadmu flimkien biex ippreparaw ikel u oġġetti minn affarijiet riċiklati.
Tkellimna wkoll ma’ Justine Spiteri, studenta tal-iskola sekondarja Maria Assunta, li flimkien mal-istudenti sħabha, fuq bażi regolari jmorru jagħtu l-għajnuna tagħhom f’dan iċ-Ċentru li dwaru kellha kliem ta’ tifħir.
B’kollox ir-Resource Centre Guardian Angel jilqa’ fih aktar minn 40 student u studenta fuq bażi full time, jiġifieri ta’ kuljum dawn l-istudenti jmorru jitgħallmu f’dan iċ-Ċentru filwaqt li l-istudenti part time jattendu f’xi ġranet matul il-ġimgħa biex jużaw ir-rizorsi li għandu l-istess ċentru.
