Il-Partit Nazzjonalista fi stqarrija esprima t-tħassib serju tiegħu għall-aħbar li l-Ombudsman ippreżenta protest ġudizzjarju kontra l-Gvern għaliex iħoss li l-Gvern qiegħed jostakolah f’xogħlu.
Fl-istqarrija maħruġa mill-Kelliem tal-Oppożizzjoni dwar l-Intern u s-Sigurta Nazzjonali, Jason Azzopardi qal li l-fatt li l-Ombudsman kellu jieħu pass fil-Qorti kontra l-Gvern huwa bla preċedent f’pajjiżna u hu konferma li l-Gvern ma jridx joqgħod għall-iskrutinju tal-Ombudsman, li huwa istituzzjoni Parlamentari essenzjali f’demokrazija.
Li istituzzjoni indipendenti, li xogħolha hu li tħares id-drittijiet taċ-ċittadini, tħoss li l-Gvern qiegħed jostakolah f’xogħol hija materja li tmiss is-sisien tad-demokrazija qal Jason Azzoprdi. Hu qal li dawn m’humiex affarijiet li jiġru f’demokrazija Ewropea normali u jmur kontra l-ftaħir tal-Prim Ministru meta jgħid li jemmen fil-valuri Ewropej.
Il-Partit Nazzjonalista fakkar li xahar ilu l-Ministru Manuel Mallia u d-Deputati tal-Gvern fil-Kumitat tax-Xogħol tal-Kamra vvutaw kontra t-talba tal-Oppożizzjoni, li kienet saret f’Marzu li għadda, biex l-Ombudsman jintalab jinvestiga x-xogħol tal-Bord tal-Inġustizzji li l-Ministru Manuel Mallia waqqaf fl-Armata. Issa jirriżulta li l-Oppożizzjoni kellha raġun.
Il-Partit Nazzjonalista appella lill-Gvern biex jieqaf minnufih jisfida l-liġi u jikkoopera bis-sħiħ ma’ l-Ombudsman. Kull ostaklu li l-Gvern joħloq biex iżomm l-Ombudsman milli jaħdem, ikun ostaklu kontra d-drittijiet taċ-ċittadini.
