Seba’ klieb il-baħar tat-tip Nursehound, intelqu lura fil-baħar fiċ-Ċirkewwa wara li ġew salvati bħala embrijuni minn klieb-il baħar mejta li kienu għall-bejgħ fil-Pixkerija.
Voluntieri mill-organizzazzjoni mhux governattiva Sharklab kienu preżenti fuq il-moll taċ-Ċirkewwa u spjegaw lill-pubbliku l-ħidma li jwettqu fir-riċerka, fl-edukazzjoni u biex titqajjem kuxjenza dwar diversi speċi ta’ ħut madwar Malta u fil-Mediterran.
Is-seba’ klieb-il baħar kienu kbar madwar 30 ċentimetru.
Fi Frar li għadda, tliet klieb-il baħar tal-istess speci ntelqu fil-baħar miftuħ fiċ-Ċirkewwa u għalhekk li reġgħu ntefgħu aktar klieb-il baħar, hi t-tieni storja ta’ suċċess għall-NGO Sharklab.
Numru kbir ta’ għaddasa ħadu sehem fl-attivita’ u ħargu ‘l barra miċ-Ċirkewwa biex telqu dawn il-klieb-il baħar zgħar.
Sharklab qed jieħu ħsieb nadwar 100 bajda ta’ Nursehound Sharks u speċi oħrajn ta’ klieb-il baħar fl-Akwarju Nazzjonali fil-Qawra.
It-tim ta’ voluntieri qed ikompli jiġbor il-bajd minn klieb-il baħar mejta li jinġiebu mis-sajjieda fil-Pixkerija.
L-għan tal-ħidma tagħhom hu biex dawn l-ispeċi ta’ ħut jingħataw opportunita’ għall-ħajja flok jinqerdu.
