Bl-iskop li kulħadd ikollu l-aqwa opportunitajiet ta’ tagħlim u b’hekk jikseb il-ħiliet meħtieġa tal-litteriżmu, jiġifieri li jkun jaf jikteb u jaqra, tnediet l-Istrateġija Nazzjonali tal-Litteriżmu għal Kulħadd kif ukoll Kampanja Nazzjonali favur il-Litteriżmu fost is-setturi kollha tas-soċjeta`. L-istrategija hi għal bejn is-snin 2014 u 2019.
Il-Professur Charles Mifsud, Koordinatur tal-Istrateġija Nazzjonali tal-Litteriżmu, waqt laqgħa mal-ġurnalisti, spjega li l-proċess ta’ konsultazzjoni biex tfasslet l-istrateġija ħa sena sħiħa u ipparteċipaw għadd kbir ta’ edukaturi, tmien gruppi ta’ ħidma konsultattivi u l-pubbliku.
Minn studju internazzjonali jirriżulta li 36 fil-mija taż-żgħażagħ Maltin ta’ 15-il sena ġabu riżultati ħżiena fil-qari. Dan hu persentaġġ ferm ogħla mill-medja tal-istudenti kollha tal-Unjoni Ewropea li kienet ta’ 20 fil-mija.
L-istrateġija tinkludi miżuri għal tmien setturi fosthom għal ewwel snin għal tfal sa tliet snin, is-snin bikrin, tfal ta’ bejn l-4 u 6 snin, għall-Primarja, is-Sekondarja, iż-żgħażagħ, l-adulti, persuni b’diżabbiltajiet u diffikultajiet biex jitgħallmu, individwi minn pajjiżi terzi u litteriżmu diġitali. L-enfasi se tkun fuq l-ewwel snin u s-snin bikrin kif ukoll is-sehem kbir tal-ġenituri u dawk li jieħdu ħsieb it-tfal fl-iżvilupp tal-litteriżmu.
Il-Professur Charles Mifsud spjega li l-istrategija hi kontinwita` tal-policies u x-xogħol tajjeb li kien qed isir matul is-snin li għaddew. Hu qal li imp0ortanti li jkollna politika bi-lingwali u bi-litteriżmu fil-Malti u fl-Ingliż. L-istrateġija taħseb ukoll biex jiżdiedu l-inizjattivi bħal programm Aqra Miegħi għat-tfal sa tliet snin u l-ġenituri tagħhom, l-ambaxxaturi tal-qari, personaġġi popolari li qed irawmu kultura ta’ qari fost it-tfal u l-istudenti u l-promoturi tal-qari. L-istrateġija tisħaq li għandu jkun hemm opportunitajiet għall-iżvilupp professjonali tal-edukaturi kollha fil-livelli kollha fit-tagħlim tal-litteriżmu.
Sadattant bħala parti mill-Kampanja Nazzjonali favur il-Litteriżmu, se jkun hemm kartattri apposta biex jippromwovu l-kultura tal-qari fit-tfal.
