Il-Gvern baqa’ ma aġixxiex dwar il-Mozzjoni li ressqet l-Oppożizzjoni Nazzjonalista f’Mejju li għadda, li tipproponi d-dħul tal-prinċipju li pazjent li jikkwalifika biex igawdi mill-Cross Border Healthcare Regulations tal-Unjoni Ewropea jkun jista’ jagħżel bejn jekk jagħmilx l-intervent barra minn Malta jew fil-Privat f’Malta stess.
Il-Mozzjoni kienet se twassal biex pazjenti Maltin ikunu jistgħu jagħżlu li jagħmlu operazzjoni fil-Privat f’Malta u jħallas il-Gvern, minflok ikollhom imorru barra minn Malta bil-problemi kollha u l-iskariġġ li dan iġib miegħu.
Il-Kelliem tal-Oppożizzjoni dwar is-Saħħa Claudio Grech qal dan waqt żjara li għamel f’St Anne’s Clinic f’Birkirkara, li toffri bosta servizzi tas-saħħa, inkluż operazzjonijiet, testijiet, radjoloġija, servizz ta’ out-patient u servizzi oħra. Hu kien akkumpanjat mill-Kelliem għall-Affarijiet Ewropej Marthese Portelli. Huma ddawwru mal-klinika mill-Manager tal-Klinika Isabelle Vella, li spjegat is-servizzi offruti u anke l-investiment li sar f’makkinarju mill-aktar modern.
Claudio Grech appella biex malli l-Parlament jerġa’ jiltaqa’ f’Ottubru, din il-Mozzjoni tkun diskussa kemm jista’ jkun malajr għax minn din l-inizjattiva jgawdu l-pazjenti u anke l-pajjiż. Qal li s-settur Privat għandu rwol importanti fis-servizzi tas-saħħa ta’ pajjiżna u matul l-aħħar snin investa b’mod qawwi f’makkinarju u servizzi biex joffri l-aħjar lill-pazjenti. Għalhekk, il-Gvern għandu jagħti aktar importanza lil dan is-settur, li jimpjega wkoll ħafna nies u hu pilastru ġdid fl-ekonomija ta’ pajjiżna.
Min-naħa tagħha, Marthese Portelli fakkret fis-70 proposta li ressaq il-Partit Nazzjonalista dwar kif entitajiet differenti, fosthom is-settur Privat fil-qasam tas-saħħa, jistgħu jgawdu mill-fondi tal-UE. Fakkret li l-Gvern Nazzjonalista kien ġab għal Malta €1,128 miljun mill-UE għas-seba snin li ġejjin.
Isabelle Vella qalet li fis-snin li għaddew St Anne’s Clinic gawdiet mill-fondi tal-UE u investa f’żewġ proġetti permezz tal-fondi.
