L-Awtorità Maltija tal-Mediċini qed issaħħaħ il-ħidma tagħha fejn jidħlu spezzjonijiet ta’ prodotti farmaċewtiċi li jkunu ġejjjin minn diversi swieq. Dan hekk kif issa, l-Awtorità qed tifrex l-ispezzjonijiet anke għal fuq prodotti li jkunu ġejjin minn pajjiżi barra l-Unjoni Ewropea.
F’konferenza tal-aħbarijiet, il-Ministru Helena Dalli tkellmet dwar l-importanza li l-prodotti mediċinali jkunu spezzjonati għax dan hu mezz importanti kif ikunu garantiti l-prodotti u l-kwalità tagħhom. Qalet li l-ispezzjonijiet mhumiex biss forma ta’ kontroll, iżda huma wkoll mezz ta’ garanzija li l-prodotti li jinġiebu minn pajjiżi barra l-UE jkunu tal-istess livell u kwalità daqs dawk prodotti fl-Ewropa.
Il-Ministru Helena Dalli qalet li l-Gvern jibqa’ impenjat li jappoġġja lill-Awtorità Maltija tal-Mediċini fl-ispezzjonijiet li qed tagħmel. Fil-konferenza tal-aħbarijiet, il-Ministru Dalli ppreżentat ċertifikati lil-Laboratorju tal-kumpanija Actavis u lil kumpanija Indjana tal-kura tas-saħħa ħalli jkomplu jespandu f’Malta.
