Filmat: Anke l-UĦM u s-CMTU ma jaqblux mal-Gvern li ma jagħtix kumpens lin-negozji wara l-blackout

Qed ikomplu deħlin aktar reazzjonijiet negattivi għad-deċiżjoni tal-Gvern li ma jagħtix kumpens lin-negozji li sofrew danni kawża tal-blackout totali tal-ġimgħa li għaddiet. Dan wara li ċerti lokalitajiet qattgħu kważi ġurnata sħiħa bla dawl, f’sitwazzjoni li kien ilha ma tiġri snin twal.

F’kummenti lil MaltaRightNow.com, il-President tal-Union Ħaddiem Magħqudin (UĦM) Jesmond Bonello qal li mill-€25 li ħabbar li se jagħti l-Gvern lid-djar, mhux kulħadd se jgawdi. Fuq kollox, sostna l-President tal-UHM, il-union tispera li dawn l-affarijiet ma jerġgħux jirrepetu ruħhom. Bonello qal li mhux biss kien hemm familji li batew il-konsegwenzi, iżda wkoll negozji u fabbriki li jimpjegaw numru ta’ ħaddiema.

Min-naħa tiegħu, il-President tal-Konfederazzjoni tat-Trade Unions Maltin (CMTU) William Portelli ukoll sostna li n-negozji kellhom jingħataw xi forma ta’ kumpens ukoll.

Dawn il-kummenti jsegwu r-reazzjoni tal-Assocjazzjoni tal-Lukandi u r-Ristoranti Maltin (MHRA), li kienet l-ewwel sieħeb soċjali li rreaġixxiet għad-deċiżjoni li ħabbar il-Gvern li jagħti €25 lis-sidien tad-djar li l-ġimgħa li għaddiet qabżu t-12-il siegħa bla elettriku.