L-ALS ice bucket challenge ntlaqgħet b’suċċess mill-Air Malta wara li ċ-Chairperson Maria Micallef u s-CEO Louis Giordimaina ġew it-tnejn li huma nnominati.
Micallef ġiet innominata mill-mara tal-Prim Ministru, Michelle Muscat, filwaqt li s-Sur Giordimaina ġie nnominat mill-Maniġer Ġenerali tal-Westin Dragonara, Michael Camilleri Kamsky.
Micallef innominat lil Claire Zammit Xuereb, Group Hospitality Director ta’ AX Hotels, Phyllis Muscat, Kap tat-Task Force Nazzjonali għaċ-CHOGM 2015 fi ħdan l-Uffiċċju tal-Prim Ministru u Tricia Dawn Williams, l-Assistenta Personali tagħha u pjanista.
Matul il-messaġġ tagħha raddet ħajr lill-impjegati tal-Air Malta talli laqgħu din l-isfida u ħeġġet lil impjegati oħra madwar Malta u Għawdex biex jagħmlu l-istess. In-neputi u n-neputija tagħha Beppe u Mia tefgħulha żewġt ibramel ilma, fir-residenza tal-familja tagħha.
Giordimaina flimkien mat-tim tal-maniġment u l-impjegati għamlu l-ice bucket challenge ġewwa l-ajruport quddiem ajruplan tal-Air Malta. Huwa nnomina lil Markus Klaushofer, CEO tal-Malta International Airport (MIA), Paul Bugeja, li għadu kif ġie elett bħala CEO tal-Awtorita Maltija tat-Turiżmu u s-CEO tal-Lufthansa Technik Malta, Steven Drewes.
L-ALS, Amyotrophic lateral sclerosis, hija marda fis-sistema nervuża, li tikkawża dgħjufija fil-muskoli u tolqot il-funzjoni fiżika. Din ma tistax tiġi kkurata u eventwalment twassal għall-mewt. L-ALS Ice Bucket Challenge, li bdiet ix-xahar li għadda, saret fenomenu li nxtered malajr ħafna fuq l-Internet. Ġibdet aktar minn 1.7 miljun kontributur li ġabru $80 miljun fil-ġlieda kontra din il-marda.
Aktar informazzjoni hija disponibbli fuq www.alsa.org. #alsicebucketchallenge
Ara l-ALS Ice Bucket Challenge ta’ Maria Micallef http://youtu.be/hurUNmJ_yUI
