Il-Prim Ministru Joseph Muscat irid jirrealizza li m’għadux f’kampanja elettorali u issa ma jistax jibqa’ jitkellem mingħajr ma jaġixxi. Hekk tenna l-Partit Nazzjonalista fi stqarrija, fejn qal li Joseph Muscat għandu jlaqqa’ minnufih il-Kumitat tal-Monitoraġġ dwar l-iskema taċ-Ċittadinanza kif ukoll il-Kumitat Permanenti għas-Saħħa mill-aktar fis possibli fl-interess tal-pazjenti u l-ħaddiema. Huwa biss kliem fieragħ dak li qal Joseph Muscat dalgħodu.
L-agħar ħaġa li jista’ jagħmel politiku hi li ma jaċċettax li għandu problema, spjega l-Partit Nazzjonalista. Hekk qed jagħmel Muscat dwar l-ekonomija. Mhux jaċċetta l-fatt li l-medja tal-pagi fl-aħħar xhur naqset. Mhux jaċċetta l-fatt li l-bejgħ mill-ħwienet u minn fuq l-Internet naqas. Mhux jaċċetta l-fatt li l-faqar qed jiżdied. Dawn kollha huma fatti li joħorġu kemm mill-istatistika kif ukoll mill-esperjenzi ta’ kuljum tal-familji Maltin u Għawdxin.
Għal darb’oħra, Muscat għamel attentat li jiddefendi l-aġir tiegħu dwar l-iskandlu tal-Australia Hall. Dwar dan l-iskandlu, Muscat ħaġa waħda jrid jagħmel, qal il-Partit Nazzjonalista: ikun onest u jġorr ir-responsabbilta’ politika.
Dwar it-trasport pubbliku, Muscat ma tkellimx. Il-Partit Nazzjonalista qal li b’hekk jidher li dan is-suġġett malajr ħareġ mill-vokabularju tiegħu. Il-ħaddiema tat-trasport pubbliku u dawk l-eluf ta’ Maltin li jagħmlu użu mis-servizz tat-trasport pubbliku ta’ kuljum qed jistennew it-tweġibiet mingħand Muscat.
18-il xahar wara l-elezzjoni ġenerali, Muscat diġa’ tilef il-kuntatt man-nies, temm jgħid il-Partit Nazzjonalista. Jekk għalih, l-ekonomija miexja ‘l quddiem, mhux l-istess jista’ jingħad għall-familji u għas-sidien tal-ħwienet Maltin u Għawdxin.
