L-eks Champion tal-Formula 1 Michael Schumacher ħalla l-Isptar Lausanne, fejn kien ilu jingħata l-kura minn Ġunju li għadda. Hu kien ittieħed f’dan l-Isptar wara li għamel sitt xhur jingħata l-kura fi sptar fi Franza.
Il-Manager ta’ Schumacher, Sabine Kehm, qalet li l-eks sewwieq Ġermaniż għamel “progress” sinifikanti minn meta ddaħħal fl-isptar Franċiż wara l-inċident f’Diċembru li għadda. Madankollu u minkejja t-titjib fil-kundizzjoni ta’ saħħtu fil-ġimgħat li għaddew, xorta għad għandu quddiemu “triq twila u diffiċli”, sostniet Kehm.
Schumacher kien involut f’inċident waqt li kien mal-familja tiegħu għal skiing fuq l-Alpi. Kawża tal-inċident, hu nżamm għal tul ta’ żmien f’koma minħabba l-feriti gravi li ġarrab. Wara l-iżviluppi tal-aħħar sigħat, Kehm qalet li issa l-eks Champion tal-Formula 1 se jkompli jingħata l-kura fir-residenza privata tiegħu fi Gland, l-Iżvizzera.
