Raikkonen irid item il-karriera mal-Ferrari
Is-sewwieq Finlandiż Kimi Raikkonen qal li jrid itemm il-karriera mal-Ferrari. Qabel dan l-istaġun Raikkonen ħalla lil Lotus u reġa’ ingħaqad mal-Ferrari għat-tieni darba fil-karriera tiegħu. Madankollu, minn dakinhar ‘l hawn Raikkonen ma kellux wirjiet tajbin u s’issa għadu ma rebaħ l-ebda tellieqa.
S’issa ġab total ta’ 41 punt, 80 inqas minn sieħbu Fernando Alonso. Dawn il-wirjiet kemmxejn negattivi ġabu magħhom spekulazzjonijiet li dan, fi tmiem l-istaġun kien se jitlaq lit-tim Taljan.
“Jien qatt ma għidt li se nitlaq lill-Ferrari. Jien irrid intemm il-karriera magħhom imma qatt ma għidt meta se jkun dan il-mument. Il-gazzetta jiktbu min kollox biex jimlew il-paġni,” qal Raikkonen. Dan tal-aħħar ma qal li għadu ma jafx x’se jagħmel la darba jirtira mill-Formula 1.
Button ifaħħar lil Hamilton
Is-sewwieq tal-McLaren Jenson Button kellu kliem ta’ tifħir għall-eks sewwieq tal-McLaren Lewis Hamilton li bħalissa qed ikollu wirjiet mill-aqwa mal-Mercedes. Meta Hamilton kien ħalla lill-McLaren biex jingħaqad mal-Mercedes kienu ħafna dawk li qalu li dan kien se jagħmel pass lura fil-karriera tiegħu imma ż-żmien ta raġun lil Hamilton li bħalissa qed jissielet għar-rebħ tat-titlu flimkien ma’ Nico Rosberg, li hu wkoll tal-Mercedes. Id-distakk bejn dawn it-tnejn hu dak ta’ 22 punt.
“Lewis hu wieħed mill-aktar sewwieqa veloċi li qatt rajt fil-Formula 1. Nemmen li hu s-sewwieq bl-akbar talent imma kulħadd jaf li f’dan l-isport irid ikollok ukoll karozza tajba u mhux biss il-kapaċitajiet biex tirbaħ,” qal Button.
